【潘嘉德榮休】星光熠熠媲美台慶 楊怡馬國明重遇令羅仲謙呷醋

撰文:洪曉璇
出版:更新:

下個月就係TVB台慶,每年都係全台藝人出動嘅日子,不過呢晚金牌監製潘嘉德舉行70歲大壽暨榮休晚宴,出席嘉賓可能比台慶更星光熠熠。除咗《少年四大名捕》吳卓羲、陳鍵鋒、林峯及馬國明難得合體,仲有阿姐汪明荃、李克勤夫婦、梁漢文、車婉婉、周勵淇、高海寧、陳智燊宋熙年、胡杏兒等。

金牌監製潘嘉德榮休,大批曾參演其作品的藝人都有到賀。(梁漢文微博)
+4

因為拍攝潘嘉德監製嘅劇集《On call 36小時》,擦出愛火花嘅楊怡以及羅仲謙拍拖到賀,佢地話多得德哥呢個媒人先可以修成正果,當正佢係爸爸一樣。最好笑係到夜晚9點幾仲未散席,羅仲謙就上載一張扁晒嘴嘅相,老婆楊怡就挨埋《On call 36小時》中嘅老公「一件頭」馬國明膊頭,謙仔留言話:「你們旁若無人,叫我情何以堪呢?」

一件頭同魚仔難得重眾,洋蔥唔好呷醋啦。(羅仲謙微博)
+1

至於同樣已離巢嘅胡杏兒亦曬出大合照,同昔日戰友吳卓羲、陳鍵鋒、林峯、馬國明、楊怡留影,當年花旦小生重聚令網友高呼回憶返晒嚟,杏兒自己都相當感概留言話:「難得的合照,我覺得還差葉璇,你們覺得呢?」被點名嘅葉璇好快貼自拍照回應話:「我正在地鐵站通頂演持槍悍匪啊!我的心跟你們在一起」

昔日小生花旦,女士們都已經做晒人妻,幾位男士真係要加油啦。(胡杏兒微博)