【全民造星】功臣花姐勁感動：綵排時喊咗次，頭先都匿埋喊咗次
撰文：陳栢宇
出版：更新：
ViuTV選秀真人騷《全民造星》昨晚（14日）在九龍灣展貿中心舉行總決賽，最後由賽前大熱姜濤贏得冠軍，而亞軍和季軍分別由Ian和Lokman獲得。節目監製花姐（黃慧君）接受《香港01》訪問時坦言非常滿意參賽者的表現：「佢哋嘅水準已經唔係參賽者，如果而家帶佢哋開演唱會都綽綽有餘！（最有演唱會感覺係邊個？）姜濤，佢綵排時我已經感覺到佢已經係星。」
《全民造星》幕後推手花姐，賽後與姜濤Ian和Lokman合照。（陳順禎攝）
至於整個騷有否進步空間，花姐就覺得有些參賽者好緊張：「龍志權手都震埋，佢綵排都震，可能係經驗問題，但以幾個月嘅參賽者嚟講，今日嘅表現已經好好。（佢哋一齊唱《前傳》好感動？）我綵排時喊咗一次，頭先都匿埋喊咗次，諗返起一開始99個騎騎呢呢跳得唔齊，到今日台下Fans跟住唱，係我想像唔到嘅事，好感動。」她又指Stanley和Edan的表演令她有驚喜。
花姐直認一班《造星》仔仔在台上唱出《前傳》時，台下一班支持者跟住唱得畫面，令她忍不住感動流涕。（影片截圖）
問會否覺得《全民造星》算是為香港電視界「做咗啲嘢」？花姐答謂：「我覺得係令觀眾知道香港係可以有自己嘅星，而最開心係有人話畀我聽，人係應該有夢想，最成功係呢樣嘢。（製作生涯代表作？）其實我好多節目都好好睇，哈哈！不過佢唔係我最鍾意嘅節目，我最鍾意係《脫獨工程》同《胖伴》，呢個節目我都好鍾意嘅，因為我好鍾意班仔仔，因為佢哋教咗我好多嘢！」花姐坦言曾一度想離開電視圈專心陪家人，但一班《造星》仔仔令她反思自己，既然他們能夠為理想向前衝，為何自己要放棄理想：「我應該趁行得走得繼續做落去。」
花姐多謝一班《造星》仔仔令她重拾對電視製作的熱情。（影片截圖）
提到日前ViuTV在發布會宣布《全民造星》有第二季，花姐笑稱公司未經她同意便公布消息：「都一定會搞，可能下年會招募，如果真係想而家呢班仔仔行多步，我會專心幫咗佢哋先，跟住先諗第二季。（下季玩女？）玩女就唔會我做監製！」