范冰冰拖最愛LV行李箱現身北京機場 坐300萬名車不失霸氣
撰文：鄺鈺瑩
出版：更新：
范冰冰對呢對Stella McCartney厚底鞋同LV行李箱可以話係不離不棄。（視覺中國）
經歷逃稅風波後，消失了135天嘅范冰冰終於現身北京首都機場，全黑打扮加上保鏢撐傘護駕，同過往嘅范爺抗扮得靚靚兼任影唔嬲可謂天壤之別。之不過，細心一睇，不難發現范冰冰雖然一身黑，但腳踏一雙Stella McCartney厚底鞋、加上身後工作人員推嘅LV行李箱，低調之餘又夠時尚。呢對Stella McCartney厚底鞋向來深受明星歡迎，范冰冰今年五月同李晨恩愛現身北京機場前，亦都係著住同一雙鞋。至於個LV行李箱，過往范冰冰出入機場時都拖著佢現身，有指係品牌為范冰冰度身訂造，行李箱上印有范冰冰的英文名字縮寫「FBB」。
有指「京A」車牌至少15萬起跳，負責接送范冰冰嘅Maybach到底係何方人仕擁有呢？（視覺中國）
而呢日接送范冰冰嘅車，亦都成為網民研究對象，因為呢架Mercedes-Maybach除了價值超過300萬外，掛上嘅「京A」車牌，被列為政府公務用車，只有官方人士、領導級人員少能使用，雖然「京A」有逐漸開放予政商名流使用，但車牌發放量仍受限制，使用者非富即貴。曾自封豪門嘅范冰冰過往多以Mercedes G55代步，亦有網友曾見過佢部火紅的Ferrari California去打高爾夫球場，不過講到最貴嘅，就一定係全球限量375台嘅McLaren P1，國內售價高達1260萬人民幣。有指自從逃稅案發生後，停泊喺范冰冰屋企樓下嘅名車全部失蹤，如今換上一部官用車接送，似乎有啲內情喎。