【後生仔傾吓偈】麥明詩曾靠男友請食飯去旅行 「但係有代價」

撰文:鄺鈺瑩
出版:更新:
FYY選港姐原來係為咗逆轉同男友嘅地位。

近期《後生仔傾吓偈》增添咗Miss Mak愛情教室呢個環節,內容離不開愛情同愛情,而愛情教室最新一課就係以「情侶間的尊卑」為題,一班後生仔公開討論如何逆轉情侶之間嘅地位。馮盈盈提到當初同男友寶寶拍拖時,由於對方已經係醫生,而自己仲讀緊書,所以無論係經濟能力、人脈等都比不上男友。

FYY對於自己係民選港姐好自豪,但更自豪自己從此比男友強勢。

不過最令FYY嬲嘅係成日被男友友人當係𡃁模,更因此激發佢去參選港姐。「十優狀元嘅醫生有好多,但港姐如今都係得50幾個,我就係其中之一,加上十幾萬人投票,認受性好大。2016年我係全香港NO.1,到目前為止地位已無可動搖,我係唔會認輸,我話唔係就唔係!」成件事係咪好勵志?!

想追麥明詩真係一啲都唔易……

之後一班後生仔又提到收入會否是逆轉的因素之一,認同呢個說法嘅麥明詩就話「但另一因素係女仔介唔介意 」,並話自己都經歷過「佢對我唔係幾好,但我飛咗佢就唔可以每年去旅行」嘅階段,但就強調「 雖然我都好養得起自己,但當我讀緊書時,無錢去旅行。佢成日請去旅行,請食飯,你會發覺自己有依賴性,而有啲女仔係會接受到呢種依賴性。我絕對唔係歧視物質舒適,但你會發覺代價係一定要承受可能係佢脾氣、或者由佢主導。」

既要有學識、有情趣同幽默感,仲要識哲學……麥明詩一講到符合以上條件嘅黃子華即時紅都面晒。

麥明詩仲話自己各方面都「好想被人征服」,但首先對象要有以下條件:勁有學識、有情趣同幽默感。「唔使靚仔,但要識哲學,識哲學嘅男仔真係好性感。」綜合以上條件,原來喺麥明詩心中嘅就係黃子華……