楊千嬅不反對兒子以K-Pop偶像為目標:小朋友需要自由發展

撰文:賴家杰
出版:更新:

楊千嬅今天(19日)出席梁詠琪(Gigi)的童裝店開幕活動,千嬅表示與Gigi相識多年當然要來支持:「我好鍾意童裝,你知道我呢啲做阿媽最鍾意買嘢畀小朋友,都幾瘋癲,佢呢到嘅質料都好好,佢開張我都好開心,因為我知佢兩夫婦都籌備咗好耐,作為父母佢哋對生活都好有目標,見佢哋都好sweet。」

提及做生意方面千嬅說還是交由老公丁子高負責:「我數學由小學開始已經好差,差到一個點,數字概念好差,所以做唔到生意,叫我做時裝一係自己鍾意一係兒子鍾意,咁樣好唔大眾化,所以都係唔好做。」

千嬅對自己做生意全無興趣。(陳順禎攝)

早前千嬅在內地節目透露兒子很喜歡聽K-Pop,千嬅笑言:「係佢介紹GOT7畀我聽,然後佢話8月出首歌都係佢講我知,可能學校音樂文化交流,佢嘅文化係前過我。」千嬅透露兒子一早認識了GOT7中的成員Jackson,也不反對兒子將來以韓星為目標,「佢鍾意音樂,我唔會反對佢做任何事,我覺得小朋友需要自由發展,去到呢知年代已經唔係以前會好嚴厲,但基本學業佢要處理得到。」

千嬅笑言兒子經常也會在家中跳舞。(陳順禎攝)