【萬千星輝賀台慶】黃智雯袁偉豪成雙料視帝視后 無綫有暗示?

撰文:黃梓恒
出版:更新:

《萬千星輝賀台慶》又創下歷史一幕,因為兩個在外地的大獎,新加坡和馬來西亞的視帝視后將會在今晚一併頒發,事關已經沒有在兩地舉行頒獎禮。早前已經講過,TVB有很多原因要取消兩地的頒獎禮,所以今次在這裡便不再提,最緊要的只是結果。

在馬來西亞的視后人選,三強分別是《BB來了》的李佳芯、《三個女人一個「因」》的黃智雯和《宮心計2深宮計》的胡定欣,投票由馬來西亞的觀眾透過網上投票,結果「最喜愛TVB女主角」由黃智雯奪得。得獎後她說:「多謝,原來真係咁緊張,我要好多謝Liza姐,因為我第一套就係拍佢,我知嗰陣我做得好差,連佢都話咁樣做戲嘅,直到頭先佢同我講呢幾年進步好大,原來真係有人睇到。多謝TVB俾機會我,多謝我屋企人,最後我想多謝胡說八道嘅姊妹同趙希洛。」

恭喜晒Mandy!

在馬來西亞的視帝人選,三強分別是《天命》陳展鵬、《棟仁的時光》袁偉豪和《兄弟》王浩信,結果「最喜愛TVB男主角」由袁偉豪第一次奪得。得獎後他說:「多謝馬來西亞嘅觀眾,《棟仁的時光》俾到我一個好難忘嘅時刻,拍嘅時候好艱難,因為每日我哋都好早起身,最遲收工,眼袋大過雞蛋,所以好貼切棟仁呢個角色,我承諾大家會拍更多更好嘅劇。我仲要多謝我拍檔唐詩詠,同埋恭喜智雯,你得獎我好開心。」

今年三套劇嘅袁偉豪終於有獎拎!

至於新加坡「最喜愛TVB男主角」的三甲名單,有《宮心計2深宮計》的馬國明、《棟仁的時光》的袁偉豪和《天命》的陳展鵬,結果視帝寶座由袁偉豪再次奪得,兩地視帝都由佢奪得!又一次得獎,他說:「呢份喜悅真係太開心,我會好好記住呢一晚,我亦都好珍惜呢個時光,入咗行20年,今年好多經歷。多謝投票嘅朋友,我會繼續去努力,演到我生命盡嘅一刻我都會做落去。」台下的女朋友張寶兒得知他連奪兩獎,即刻開心到連講幾句:「你好叻啊!」

雙料視帝,勁呀!

至於新加坡「最喜愛TVB女主角」的三甲名單,有《BB來了》的李佳芯、《三個女人一個「因」》的黃智雯和《宮心計2深宮計》的胡定欣,跟馬來西亞一模一樣,結果由黃智雯奪得,同袁偉豪一樣做雙料視后。再次說出得獎感言,她說:「真係好幸福,一晚可以兩次感受呢個喜悅,多謝星、馬投我嘅朋友,再次多謝TVB,《三個女人一個「因」》團隊、台前幕後、編審,特別想多謝潘嘉德先生,由我出道一路以嚟俾好多機會我,發掘到黃智雯好多面,今年你70大壽,我無乜大禮俾你,我想同你分享呢份喜悅。我要多謝袁偉豪,好開心同你一齊拎獎。我到今日都好相信,努力未必有回報,但如果努力一定有人睇到。」

再次恭喜Mandy喇!

一直都話新、馬兩地的結果是TVB《萬千星輝頒獎典禮》的前哨戰和預測,今次袁偉豪和黃智雯強勢奪下兩獎,難道下個月的香港視帝視后真係有佢哋份?

唔講咁多住,睇吓兩人靚相先!

今日著得咁靚,又有獎攞,真係開心死佢喇!(梁碧玲攝)
+13