【萬千星輝賀台慶】袁偉豪成雙料視帝感知足：歡樂過後係寂寞

《萬千星輝賀台慶》在昨晚完美落幕，對觀眾來說可能只是一個兩、三小時的電視節目，但對TVB藝員台前幕後，卻是一個馬拉松式「考驗」，有的藝員甚至為短短15分鐘表演花1個月時間排練，能安座「觀眾席」的其他藝員，少說也需由早上工作至晚上11點。難怪同晚新加坡以及馬來西亞視帝雙料得主袁偉豪，在完騷後接受《香港01》時也說：「今晚就不能盡興啦，頭先喺個節目上面已經好開心。」

袁偉豪續說：「因為聽朝一早仲要有活動做，後朝又有嘢要拍，所以呢一兩對我嚟講都係要守規舉啲，唔可以食太多，又唔可以飲咁多水。（聽日開幾點？）聽日10點要化妝啦。（都唔係好早啫）可能我今晚瞓唔著呢。（太興奮？）唔知吖，其實歡樂嘅過後都係寂寞嘅，所以返到屋企，唔，都係瞓覺啦，做完一場騷，或者做完一日嘅工作，咁大嘅喜悅，得到獎項，最後尾都要休息嘅，所以就唯有瞓一覺好啦。（瞓唔著望天花板就望天光？）哈哈，係掛。」

成為雙料視帝後，慶祝活動自然少不免，除了在台上讚袁偉豪：「你好叻吖！」的張寶兒外，袁偉豪最想一起分享喜悅的就肯定是屋企人。他說：「一定要搵埋屋企人食吓飯先啦，我屋企人好支持我，佢哋喺Whatsapp喺咁Send Message，又影低頭先Live Show情況。啱啱得獎時間，佢（媽媽）幫我影住我電視，又Cap圖講好多恭喜說話。（好Warm！）係吖，我都叫佢哋早啲休息啦。（個WhatsApp Group有咩人？）有媽咪啦，阿姨，舅父，總之Family個Group仲有好多人。」

問及袁偉豪會否想再下一城將剩下的香港視帝囊括其中時，袁偉豪就說：「如果用呢個心態去諗，當然（攞埋）係Perfect嘅，但係我覺得人有時要知足嘅，我已經好滿㗎啦。當然，如果真係好似你講（成為三料視帝），咁我又接受。（心裡面都係想？哈哈）我其實係平常心嘅，我真係平常心，所以今晚當我第二次再上台得獎，我都有少少不知所措，都需要保持自己情緒穩定，因為真係好多人要多謝。（視帝攞埋結婚咁就Perfect？）其實人生仲有好多事情要做嘅，雖然，我哋好多時都要追求美滿完滿，但係又唔一定要結咗婚先係Perfect嘅。不過，呢啲問題我遲啲會答你哋㗎啦。哈哈哈。（即係幾時？）有消息嗰時囉。」知啦，工作為重，雙方都有互識吖嘛。