羅志祥女友下廚為未來奶奶慶生 網友讚周揚青娶得過
撰文：董欣琪
出版：更新：
台灣藝人羅志祥（小豬）同女友周揚青（Grace）拍拖多年，隨住感情越來越穩定，兩人都愛得越來越高調，11月20號係羅媽媽生日，Grace特登親自下廚，炮製美食孝敬未來奶奶，獲眾人一致認可，小豬仲在社交網站同女友隔空放閃！
一向出名孝順嘅小豬，20號在社交網站大曬同媽媽嘅合照，仲搞笑話：「香蘭 生日快樂喔 晚上要去夜店還是唱歌 讓妳選 我都奉陪 一起嗨到爆炸 也祝所有今天生日的朋友們生日快樂喔 平安健康！」女友Grace留言：「香蘭看到這篇會打你。」兩人互動認真搞笑。
羅志祥為媽媽慶祝生日，兩母子鬼馬合照。(IG圖片)
而深得羅媽媽歡心嘅Grace，就親自下廚煮咗7道菜，足足10人份，收服埋羅媽媽個胃！見佢post咗一張成枱餸被掃清光嘅相，仲好得戚話：「我今天做的菜被吃光光，得到了全部人的一致認可！」女朋友咁賢良淑德，小豬都賣口乖大讚：「只要有心，人人都能成為食神，你行，太好吃了！」Grace更放閃回應：「等我學好宮保雞丁和滷肉飯，你就再也不用買便當。」Grace嘅廚藝唔止獲男友肯定，網友都大讚佢好煮得，留言向小豬催婚：「可以趕快娶回家了！」
Grace親自下廚，全部被掃清光。(IG圖片)
小豬同Grace隔空放閃(IG圖片)
足足十人份量，真係唔簡單架。(IG圖片)
小豬2015年大方認愛之後，兩人不時在網上放閃，上月Grace被目擊同羅媽媽歡度家庭日，飯後仲同車返回小豬之前豪擲2.7億台幣買下嘅內湖豪宅，但就有網友指Grace嘅身形較以往圓潤唔少，因而被爆出疑似懷孕，更惹來外界猜測今次同長輩見面係討論結婚事宜。而小豬之後就透過經理人回應：「明明不胖也不矮，怎麼會拍得又胖又矮？上次吃飯也被拍成五五身，拜託特勤大哥以後拍漂亮一點」，否認Grace懷有身孕一事。
雖然小豬同Grace仲未正式拉埋天窗，但Grace出得廳堂，入得廚房，呢位準台灣新抱絕對娶得過呀！