【解決師】王浩信連場打戲終告受傷 左手打石膏宣佈手指骨折
撰文：洪曉璇
出版：更新：
最近正在熱播嘅劇集《兄弟》打戲連場，男主角王浩信當然都係動作戲連場，打得有板有眼。拍攝中嘅新劇《解決師》中，王浩信繼續要日打夜打，呢日忽然上載兩張「露骨照」，原來佢打到手指骨折要打石膏﹗
王浩信喺正在熱播嘅劇集《兄弟》中打戲連場，好似圖中呢場戲就打足9個鐘。（王浩信IG）
劇集《解決師》7月初舉行開鏡儀式，但睇返王浩信IG，佢早喺半年前已經開始特訓，仲搵嚟好朋友伍允龍監督，訓練武打動作，應付戲中連場動作戲。呢日佢喺IG話：「為咗慶祝單野，就同大家分享一張入行以來最露骨嘅相，鼓勵大家要keep住團火！」所謂嘅露骨唔係性感照，而係X光片一張﹗
王浩信左手打石膏，睇嚟真係要好好休息下啦。（王浩信IG）
原來連場打戲令王浩信左手受傷，X光片中明顯見到骨折位置，佢仲要打石膏，睇見都覺得痛呀﹗「隻手傷咗幾日，再完成埋呢幾日打戲，拍攝中嘅《解決師》戲入面嘅打戲終於告一段落，我都忍不住去睇醫生，發現尾指骨折了，所以未能出席早前頒獎禮記招，抱歉。不過呢個post唔係要令大家擔心，而係想同大家share下，經過呢件事，我發現原來我底嗰浸當我面對自己鐘意做嘅野，痛都可以唔理嘅質地無被歲月沖淡，就好似以前拗咗柴第二日就落場打波嗰種熱血，仲好似比以前嚴重咗。我真係覺得幾開心，因為我感到活著！」
從X光照中睇到，王浩信左手尾指近手掌位置明顯骨折。（王浩信IG）