【是咁的，法官閣下】細細粒睇《踏血尋梅》學分屍：嗰陣情緒好怪
《是咁的，法官閣下》話咁快已經去到結局篇，劇中飾演阿Bell嘅細細粒因為被杜大偉飾演嘅Lone虐打而跟佬走，結果變成殺人及肢解屍體案疑犯，由於Bell本身乃低智商人士，面對指控完全無力反駁，只係識得喊同喊，同過往佢多數飾演嘅角色有所不用，佢自己亦喺fb寫到為《是咁的》投入了不少心思，希望觀眾能感受到不一樣的她，並指「哭得眼睛也快瞎了，情緒一直進入狀態內」，而喺噚晚(27日)嗰集，陳志健飾演嘅鬼，於警局內指細細粒將屍體切開一碌碌，而另一邊廂，細細粒則好無助咁承認自己有買過牛肉刀同雪櫃……
細細粒接受電話訪問時透露呢一幕可以話係一個序幕。「我係無殺人，但有處理屍體，之後我基本上都係喊戲，喊到監製都話要cut走啲。」細細粒雖然很想入戲，但現實中完全未經歷過殺人、分屍等行為，所以當監製跟佢講解劇情、要求喊出絕望、驚慌感覺時，都覺得有少少難。「我最後係困咗自己喺監倉入面45分鐘，令自己陷入一個情緒當中，再加上拍攝之前睇咗《踏血尋梅》，所以都做到監製想要嘅嘢。」
細細粒嘅戲份雖然唔算多，拍攝時間約為一個月左右，但由於每日都要喊，所以都幾有挑戰性。「因為要保持住嗰個情緒，所以當時個人係怪怪哋，每日返屋企隻眼都腫晒，阿媽都有問咩事，好在佢都明我做咩緊。」其實細細粒向來都易喊，但喊足一個月都唔係易事，除咗試過喊到唔知做乜，亦試過喊到眼乾。「一日至少喊4個鐘，最勁好似係8個鐘，因為要拍單機同wide shot，有次真係喊唔出，我拎咗爸爸張遺照出嚟睇，即刻崩潰。」問到Bell最後能否脫罪，細細粒就大賣關子，但就暗示因為有角色會死，令佢更難甩身……
劇集播出後，唔少網友都大讚細細粒演技十分出色，又叫佢多啲返大台拍劇，其實細細粒已差不多兩年未有拍大台劇，今次以《是咁的》同觀眾見面，且反應咁好，相信大家好快又會見到佢嘅作品。提到與陳志健處理屍體一幕，細細粒指有部分鏡頭只需拍出感覺。「其實現場拍唔係好恐怖，監製見到我係咁震以為我驚，其實係因為我跪到好痛，生理比心理痛苦，同埋塊面啲血係噴上去，都係咁補。」細細粒表示雖然監製拍攝前有收集相關資料給她參考，但佢就一直都無睇，直到劇集播出後，她才上網查看。「覺得自己真係演繹出低智人士嘅無辜，而陳志健嘅眼神亦好令人心寒。」