【是咁的，法官閣下】細細粒演活角色：當你好鍾意就點都會做好
撰文：鄺鈺瑩
出版：更新：
細細粒於《是咁的，法官閣下》演智障人士角色，並涉及殺人及肢解屍體案件，每集都有不少爆喊場面，網民大讚細細粒演活角色，更認為佢值得擁有「飛躍進步女藝員」的獎勵，可惜嘅係，劇集播出時，台慶「飛躍進步女藝員」角逐名單已出爐，細細粒整定無份，不過佢接受電話訪問時，就好樂觀咁話被觀眾肯定已經好足夠，並十分謙虛指自己唔係好勁。「其實拎咗又點？我覺得比人知道我原來可以演慘情戲仲好，如果呢個角色係阿田（田蕊妮）做，大家都好有信心佢handle到，點解我做會有咁大迴響？係因為我一直未被認同。」
細細粒話監製只係要求佢演繹一個十幾歲的小女孩。「其實Bell未必係智障，可能係我本身智障。」
細細粒過往的角色都大情大性，今次集集喊到令人心噏，成功令觀眾看到她另一面，她在訪問時多次感謝監製記得她的存在。「其實我一直好想做啲生離死別、喊到肝腸寸斷嘅戲，例如親情或者自身嘅殘障，表達唔到自己嘅憤怒，喊到要死嗰隻，因為咁先最震撼人心，但一直都無機會，所以收到劇本時真係好開心，而當你好鍾意呢件事時，你就點都會做得好。我讀劇本時已經喺個腦預想幾個畫面，邊啲位要縮膊、邊個位要口窒。」
被網民封為「女版何遠東」，細細粒就話：「何遠東一直係我好朋友，可以同佢齊名，梗係開心啦！」
細細粒近年經常北上演綜藝節目，近日又拍攝央視劇集，是否對演技有所幫助，佢就好直接咁話：「其實只不過多一個地域性發展，內地太多精英，要上位並唔易，語言已經好大障礙，自己都仲有好多嘢學習。同埋呢行真係好講機會，說實在呢行有邊個唔努力？那怕只有一句對白，大家都會好珍惜，但機會未到就未到。」細細粒話自己雖然不時北上，但她從沒有放棄香港市場。「我係全職演員，那怕係一個過鏡師奶角色，我都會演，亦有信心可以做好。」問到老闆王祖藍可有讚賞她的演出，佢即時打工仔上身，指老闆如果親自出馬，絕非好事。「我之前返內地拍劇，佢都只係send過『拍攝順利嗎』呢5隻字比我。」
一幕幕的喊戲令觀眾加分，細細粒感謝監製揀佢做Bell一角。「自己情緒都好易波動，所以演上嚟都有幫助。」
細細粒話劇集播出之後，編劇都擔心佢情緒會再次陷入暗黑當，特意致電慰問。「大家唔使擔心我抽離唔到角色，拍完之後去咗旅行，咩事都無。」
+14