陳家樂原來做過外賣仔 唔夠醒目被老闆鬧爆
撰文：洪曉璇
出版：更新：
好多藝人都做過唔同行業，吸收經驗幫助入戲又有，為生計做兼職又有，特別係要面對客人嘅工作，真係反應慢啲都出事。陳家樂入行多年，今年總算開始有收成啦，呢日拍攝廣告時要扮侍應，令佢不禁想當年，原來佢都做過外賣仔﹗
陳家樂今年人氣急升，拍攝廣告時不停被圍要求合照，直情係師奶殺手一樣。
「你唔係外賣仔﹗」即使好戲如周星馳，都未必駕馭到外賣仔身份，大家可能覺得拎住份外賣文俾個客，收錢返公司就完成任務，但家樂就分享返，其實當中都好考應變能力架：「以前其中一份暑期工係喺茶餐廳做外賣仔，有一次踩單車送外賣，踩到中途突然炒車，啲奶茶倒瀉晒，得番一半，但嗰陣時勁白痴，唔識得返去茶餐廳斟過杯，就咁將嗰半杯送去俾個客，跟住個客打去茶餐廳投訴：『點解得番半杯？』，老闆仲以為我自己飲咗，哈哈。」
每份工作都有其專業，當年做過外賣仔都有助陳家樂依家拍戲架。
家樂原來同餐廳工作者都相當有緣份，除咗暑期工，佢仲即時諗起細個同媽媽去連鎖快餐店食嘢，俾女侍應鬧到喊嘅往事：「媽咪行開咗，我自己坐喺度食，但食到勁污糟邋遢，跟住有個姐姐走過嚟：『小朋友，你唔好食到咁污糟喎，你咁樣唔啱㗎喎。』我聽到就喺度喊，媽咪返嚟後問我乜嘢事，我話個姐姐話我食得好污糟，媽咪話：『啱呀！人哋咁話你係啱㗎！』然後個姐姐就過嚟同我媽咪講唔好意思：『搞喊你個仔。』媽咪話：『你啱呀！你鬧佢啦！佢真係好污糟邋遢㗎！』自此之後就好記得食嘢唔可以整到張枱污糟邋遢啦。」