岑麗香大肚睇運動廣告都喊：以為自己痴咗線
撰文：冼燕珊
出版：更新：
岑麗香日前在IG公布有喜，昨日（7日）出席活動，雖然已經有5個月身孕，但香香依然四肢纖幼，真係完全肥肚唔肥人。
香香早幾日出席活動時已被發現有孕味，但當時佢否認懷孕，今日就為此解畫：「因為好想當面通知親戚呢個好消息，所以一直hold住唔認住，唔想佢哋睇報紙先知道消息，同大家講聲唔好意思。」
香香陀緊5個月BB都依然明艷照人。（吳宇峰攝）
雖然本來已經計劃好同老公過兩年二人世界先生B，不過當香香同老公強強知道有BB時，依然非常意外，「其實我好遲先發現，呢半年成日飛，我以為只係時差覺得特別攰，覺得唔對路先去驗孕，老公初頭都唔信，不過大家都好開心。」至於BB性別，香香就話唔想知住，想保留驚喜，仲話男仔女仔都無所謂，BB健康就ok。
雖然有孕在身，香香仲著住5吋高踭鞋，大家都叫佢小心行路。（吳宇峰攝）
香香話自從懷孕之後，受荷爾蒙影響，情感好容易被牽動，「有一日老公開一個波鞋廣告畀我睇，我睇睇吓，無啦啦流眼淚，竟然咁都感動，我唔知自己係痴咗線，定係荷爾蒙發作，每一步都好新鮮，每日都學習去面對。」
只要BB健健康康，香香就心滿意足。（吳宇峰攝）