麥明詩27歲生日天未光開工拍《殺手》　自爆收荷里活男星交友私訊

細個嘅時候每年都會熱切期望生日嘅來臨，早早請定假約朋友，計劃慶祝活動。但人愈大反而會慢慢視之為平常日子，簡單平淡是福。12月11號係麥明詩27歲生日，佢選擇喺工作中度過，5點幾已經返到電視城化妝準備開工，仲分享自己收到一份特別嘅生日禮物﹗

Louisa 27歲生日一大早天都未光，已經返到電視城化妝，拍攝劇集《殺手》，收到一份生日禮物。原來Louisa喺網上都收到份大禮﹗佢喺IG Story貼出一張截圖，居然係來自荷里活影壇巨星麥迪文（Matt Damon）嘅Inbox呀﹗內容寫住：「Hi beautiful, I am Matt Damon from United States. A Hollywood actor, please can I know more about you? I am interested in you.」不過睇真啲，得59個Follers嘅，原來只係個假帳戶，真正嘅麥迪文係無IG戶口㗎。雖然明知係假，總算成功搏得Louisa一笑，當然就貼出嚟同大家分享下啦。

踏入生日嘅凌晨12點，Louisa貼出一張長髮舊照，坐喺草地上笑得相當開心，佢留言話：「26歲開始的並不燦爛 - 還記得我去年生日時因個人經歷及輿論壓力感到巨大的挫敗感和傷痛，往後幾個月更續於自我矛盾及迷茫中掙扎著。但這段時間給予了我機會去生活和成長 - 因爲生活就是有黑有白有笑有淚，成長就是在黑暗中仍展望明天太陽會出來，並且在陽光下知道黑夜將又會來臨卻能處之泰然... 26歲的下半年，我收到好多禮物 - 拿到資格、遇到一些貴人、參與的劇集播放、迎接更多的節目及拍攝。這許多的禮物，去年給我的話我可能會覺得理所當然，但今年的功課讓我學懂每一件好事都要好好珍惜。」Louisa亦分享自己嘅生日願望：「不是明年順利開心 - 反而是明年能在不順利中仍懂得開心 - 因為pessimistically optimistic來說：「it could have been worse」」