張學友開騷唔只做善事 永久預留指定位置背後有洋蔥

撰文:鄺鈺瑩
出版:更新:

歌神張學友為期兩年嘅世界巡迴演唱會「A CLASSIC TOUR學友.經典」,下個月將在香港畫上完美句號。雖然一票難求,但有指學友每場都會預留「第8行26號」呢個位置,原因係有位患癌症嘅歌迷,最大心願就係去睇學友演唱會。

學友嘅世巡快將落幕,唔知仲會唔會有逃犯被捕?(視覺中國)

雖然佢幾經辛苦先買到「第8行26號」呢個位,但開騷前不幸過世,有指學友知悉後十分難過,於是決定將每場演唱會嘅第8行26號永久保留,藉以紀念呢位忠實歌迷,感謝佢同病魔對抗時,仍不忘對自己嘅喜愛,用生命去支持自己,到底呢個傳聞係真係假呢?學友雖然冇回應過,但其所屬唱片公司環球就話:「無此安排,唔清楚係咪歌迷自發行為。」

有指學友為紀念去世歌迷,而將第8行26號坐位留空。(視覺中國)

有網友指出,會每場演唱會預留特定位置嘅其實係內地歌手周筆暢,事緣唱片公司早年為周筆暢舉行首埸個人演唱會前夕,其好友因交通意外去世,周筆暢為紀念好友,而將與自己生日7月26日同號嘅「第7行26號」坐位永久不賣,並會在該位置放上鮮花。

周筆暢每次開騷,第7行26號位置都唔會出售。(視覺中國)
仲會放埋鮮花在該位置上,但旁邊嘅觀眾會唔會有少少驚?

學友雖然無預留位置,但佢每次開騷,都會叫朋友以米代替花籃、又或者叫朋友將心意轉化做善款,幫助一班有需要嘅貧困老弱長者,等佢哋可以得到免費中醫診療服務。下月嘅香港站,學友都鼓勵大家將心意轉化做善款,因為每100元就可以幫助一位病人獲得一次免費嘅中醫診療及3日內服藥。
 

+4