容祖兒坦言同劉浩龍已分了手好耐:結婚同戀愛唔一定必要

撰文:張嘉敏
出版:更新:

正所謂健康是無價寶,容祖兒踏入2019年亦都要努力調理身體,她說:「前一段時間我個人處於好亢奮嘅狀態,工作上成日都好似要衝住咁樣去,年齡同體力上都消耗好多,所以今年係一個好嘅時間畀我去調理,我睇咗中醫。」祖兒服完中藥後睡得比以前更好,笑言好神奇地每晚都識得眼瞓,且沒有那麼怕凍,而原本性格比較急躁的她也沒有這麼「忟憎」:「我個人追求完美,但世事係無完美㗎嘛。醫師叫我解決唔到嘅嘢就擺埋一邊,食完啲藥我又真係唔忟憎喎。」

Joey又透露將會同好姊妹Twins的蔡卓妍和鍾欣潼一起去旅行,對於她們兩人均會帶同另一半同行,去年被傳已跟師兄劉浩龍分手而回復單身的祖兒,就表示自己仍未找到另一半。問到祖兒何不找師兄一起出遊,她說:「吓!冇喎!冇咗好耐啦!(之前有傳你哋復合?) 作為藝人,我所講嘅每一句說話同聲明對任何人都有影響,感情事我一直係想低調處理,但既然問到我,我就好誠實咁同大家講,我依家係單身。」又強調感情事急不來,隨緣吧,她也好享受自己一個人:「結婚同戀愛唔一定必要。」

容祖兒今年正努力調理身體。(梁碧玲攝)

提到今年是祖兒入行20周年,她透露演唱會將會於今年年中舉行:「多謝大家畀呢個機會我,同埋咁期待啦,我一有新嘅消息就會同大家講。呢段時間已經係密鑼緊鼓咁開會,錄歌,又偷偷地去咗影poster,我都會去拍一個音樂特輯同大家分享我嘅內心世界。當然唔少得有舞蹈啦,我嘅目標唔係場數,而係要以一個最佳嘅狀態去負責任地做一場令大家滿意嘅show,大家睇完會覺得好開心嘅,咁就已經足夠喇。」

祖兒入行20周年希望為大家帶來good show。(梁碧玲攝)