金牌監製德哥離巢 林秀怡如失靠山:有時未接到劇真係好怯

撰文:鄺鈺瑩
出版:更新:
秀怡媽媽抗癌成功,但由於5年內都有機會復發,所以林媽媽仍需要定期接受觀察。(黃國立攝)

去年因《是咁的,法官閣下》而成功入屋嘅林秀怡(Kirby),多年來為生計而打過唔少工。兩年前同朋友喺旺角開設手工意粉餐廳嘅佢,為增加客路,呢日特意去學3D拉花咖啡,笑言自己係手殘嘅佢喺師傅協助下,都整得有模有樣,之不過,到佢獨力上陣時,可愛小豬變成流鼻涕的小豬,過程有幾爆笑可以即睇片。

林秀怡喺師傅嘅指導下,成功學會3D拉花咖啡。(黃國立攝)
但之後單拖上陣,佢就有少少亂,而隻豬亦不停流口水……(黃國立攝)

雖然3D拉花咖啡能夠吸引唔少少女,但林秀怡就話由於所經營嘅餐廳以翻檯為主,所以暫時都唔會考慮更新menu。「將來如果開分店係可以加入3D拉花,而家開業兩年,其實應該已經回事,想在不同地區擴充,但因為我哋得兩位師傅,未搵到人可以傳受技術,啲食物咁樣好難會保持到水準,二來唔想一賺到錢就去開分店。」

呢份勞作咁特別,當然要拍照留念。(黃國立攝)

入行10年,林秀怡由路人做到近年「有名份」的角色,更為金牌監製潘嘉德御用演員之一,之不過,隨著潘嘉德離巢,林秀怡工作大受影響。「以前可能兩三個監製輪住搵我拍劇,變相係劇接劇,但而家用開我嘅都走晒,我自己又唔太識去social,所以影響一定有,唯有比啲時間,咩角色都接,同做好佢,等其他人見到。」去年《是咁的》雖令林秀恰曝光率大增,但她當時就話過未有因而令工作大增,幸好最近終於接到新劇《唐人街》,與唐詩詠、陳山聰等人合作。「有時未接到劇真係會好怯,因為其他監製未必識用,PA搵我做路人又唔係、搵我擔正又唔係,所以係好難。但我相個呢啲時間會過,而家有時間就會去拍片、剪片增值自己同增加曝光率。」

「話我係《是咁的》做得好係抬舉咗,自覺仲有好多進步空間,同埋要再努力啲,因為有好多比我更努力嘅人。」

等待對藝人來講雖然係閒事,但過程痛苦,幸好林秀怡性格樂天。單親家庭長大的大,去年為救患癌媽媽而花盡所有積蓄,就連婚事也受到影響。「同男友有結婚共識,但因為用晒啲錢而家唔知點算,30歲結唔到咪32囉,我好隨意,唔想SET死自己。」說畢「用晒啲錢而家唔知點算」秀怡即時哈哈大笑,似乎並未有為「錢」路而感到太擔心,並笑言男友雖然係導演,但完全唔將自己推薦予同行友人。「識導演嚟做咩?真係嬲!佢成日都話啲人要搵就自然會搵,佢係公私分明嘅人。」

 

場地提供:笠笠咖啡 Lov Lov Coffee

+2