【多圖】馬德鐘乖仔馬在驤簽邵氏 馬神認入行:可能一齊拍廣告

撰文:洪曉璇
出版:更新:

擁有藝人父母優良DNA,星二代無論外形定演藝才能都比一般人有優勢。馬德鐘囝囝馬在驤(Xiang)早幾年仲讀緊中學時,高挑身形陽光外表,泳術高超曾獲多面獎牌,仲識多種樂器,早已被網友睇好係男神接班人。呢日喺娛樂公司網頁忽然發現Xiang藝員資料,馬德鐘接受《香港01》訪問時表示:「係呀囝囝同我一樣簽咗俾邵氏。」

2013年馬德鐘同太太慶祝結婚20周年,當年只得15歲嘅馬在驤已經幾近同爸爸一樣高。(視覺中國)
馬在驤亮麗外形,早已被網民睇好係男神接班人。(馬在驤IG)
原來馬在驤唔聲唔聲已經簽約邵氏成為旗下藝人。(網上截圖)

現年20歲嘅馬在驤(Xiang),現正於澳洲修讀機械工程二年級,馬德鐘夫婦每次被問到囝囝會唔會入行,都表示要佢讀完書再決定。Xiang仲有2年幾先畢業,但依家已經簽約,唔通計劃有變?馬德鐘接受《香港01》訪問時表示:「哈哈哈其實簽約都係呢幾個月嘅事,主要因為好多工作打俾我去接洽佢,但我自己真係無咁多時間去處理,我去傾又唔知點咁,所以咪交埋俾邵氏處理囉。」

2017年9月,馬在驤19歲之齡為Hermès獻出處男catwalk show。(馬在驤微博)
馬在驤高中時曾喺香港出席公開活動。(視覺中國)
+9

其實Xiang 19歲時為Hermès到法國獻出處男catwalk show,亮麗外形加上毫不怯場,外界早已睇好佢遲早步爸爸後塵入娛樂圈,馬德鐘表示:「(嚟緊囝囝會拍戲定做MODEL?)真係未有大方向,呢一刻佢都係讀書為先。(會唔會父子合作呀?)之前有一齊幫澳門時裝周影咗輯相,如果對手戲呀?可能一齊拍廣告比較有機會。我諗佢對電視電影都有啲興趣,但最終對幕前定幕後邊個範疇最有興趣,因為音樂方面都好有興趣,小提琴鋼琴結他都有玩開,最終想向邊方面發展,就真係要等佢讀完書自己再決定。」

之前兩父子為澳門時裝周拍攝廣告。(馬在驤IG)
馬德鐘話囝囝對音樂都好有興趣,小提琴鋼琴結他樣樣精通。(視覺中國)
+3