《流行經典50年》播出至今近80集，每集都有好多不同的嘉賓上節目唱歌，令大家大飽耳福。不過不知道大家有沒有留意到，作為唯一一個做足咁多集主持的薛家燕其實集集都著不同的靚衫做節目，她接受《香港01》訪問時講過自己因為很著重這個節目，而且知道觀眾都喜歡睇靚衫，所以會特意訂造裙子。觀乎近來家燕姐在節目中的衣著都非常華麗，甚至好似差不多有齊彩虹咁多種顏色。自2015年來，她在無綫台慶頒獎禮的一身黃袍「登基」造型深入民心，不過近來家燕姐在《流行經典50年》的打扮，有些裙都好有公主feel，難道她棄「登基look」而轉行「公主look」？（圖片來源︰電視截圖﹑Instagram@kayinsit）
家燕姐喺68集著呢條粉肉色裙，有好多皺褶，仲有大裙擺，勁「公主風」。她接受《香港01》記者訪問時，曾表示自己好注重在節目的衣著，在個幾月前就會訂造衣服，非常一絲不苛。（電視截圖） 講到七彩，又點少得家燕姐最愛嘅黃色呢？不過今次唔係「登基黃」了，而係一條兩肩有皺褶﹑仲有魚尾嘅晚裝，同之前嘅「黃袍登基」好唔同，驟眼睇，好似有啲似《美女與野獸》裏面嘅貝兒條裙𠻹啊！（電視截圖） 其實除咗黃色之外，家燕姐都好鍾意著紅色㗎，呢件晚裝就好似綁咗個大蝴蝶結喺膊頭咁，好似變咗份禮物咁，再加上腰間金色嘅detail位，好高貴啊！（電視截圖） 講到七彩，又點少得藍色呢。呢條裙心口有特別嘅cutting，下身係紗紗裙嚟。呢隻藍色，又有冇啲似灰姑娘條裙嘅藍呢？（電視截圖） 呢條裙雖然係黑色為主，但上面有好多桃紅同粉紅色嘅花花，非常年輕，都有啲小公主嘅感覺。（電視截圖） 呢條裙頸嘅位置就有一條仿絲巾，上身就有少少似制服咁，下身就有散開嘅裙擺，同平時家燕姐著嘅裙有啲分別，橙色仲更加令人耳目一新𠻹！（Instagram@kayinsit） 家燕姐呢條珠片裙都係「一字肩」，仲有個蝴蝶結喺心口，成個設計都好似公主啦。（電視截圖） 呢件紫紅色嘅晚裝又係一個新嘗試。家燕姐接受《香港01》記者訪問都講過︰「有時有啲人都問我『點解著得咁sexy？』因為我啲衫通常喺歐洲訂返嚟嘅，歐洲啲款就比較開放啲嘅，咁有時我喺前面加咗啲嘢㗎𠻹喇。（你自己覺得性感點都可以？）都冇乜問題，健康就得㗎啦。」呢條裙其實都有少少性感，不過家燕姐都唔係好介意，好睇就得啦！（電視截圖） 家燕姐喺42集著嘅紫色裙，就冇平時咁華麗隆重喇，材質比較casual，不過都有佢最愛嘅「一字肩」cutting。（電視截圖） 除咗平時嘅款式，家燕姐都著過一條紫色珠片裙，就畀人一種較經典的感覺啦。（電視截圖） 家燕姐罕有地著白色，肩膀上仲有兩朵花花，好有青春氣息啊。（電視截圖） 除咗鮮艷嘅顏色，家燕姐有時都會著比較沉實嘅黑白灰，第64集節目，佢就著咗條灰色嘅裙，為咗睇上去唔好太沉悶，裙身都加咗好多羽毛㗎。（電視截圖） 為咗呈現唔同嘅風格，家燕姐就喺呢次表演嘅時候，少有地著咗黑色為主調嘅裙，但就有銀色閃閃效果，好有霸氣！（電視截圖） 呢條黑色裙好有宮廷feel，仲有啲暗黑系路線𠻹，唔通今次唔行「公主風」，行公主嘅後母路線？講笑啫，不過的確同平時嘅家燕姐好唔同呢！（電視截圖）