【大醬園】吳岱融今年60大壽 麥花臣開個唱慶祝：歌都準備好
撰文：吳子生
出版：更新：
吳岱融（鷲哥）今晚（28/5）現身將軍澳電視城出席樊亦敏（Amy）生日飯局。鷲哥表示特意提早到電視城連同其他同劇演員一齊同Amy慶祝：「一陣食完餐飯後，又要入廠拍劇，都要拍到2至3點先收得工，之前一日收夜，夜接日咁工作拍嘢搞到病咗，食住藥開工，啲藥食咗會好攰，都搞唔掂，不過宜家好咗好多。」
樊亦敏（Amy)生日，一眾《大醬園》劇集演員齊集電視城為Amy慶生。（梁碧玲攝）
鷲哥今年8月就60大壽，談到會否大肆慶祝，鷲哥表示：「自己都仲諗梗，不過宜家傾梗會喺8月份喺旺角麥花臣，搞個個人演唱會，預計會唱足兩場晚，成事機會都有9成，自己嘅歌都已經準備好，不過未係時候向外公布，到時再落實再話俾大家知。」
吳岱融出席生日會後便要入廠拍攝劇集《大醬園》。（梁碧玲攝）