《BB來了》續集有怪獸家長出現? 黎諾懿:將重任交畀李佳芯啦!

撰文:鄺鈺瑩
出版:更新:
《BB來了》續集將於10月開拍,並由原班人馬上陣。(劇照)

大台劇集《BB來了》去年播出時深受觀眾歡迎,亦令李佳芯初嘗視后滋味。劇集難得叫好叫坐,有消息指大台將準備喺10月開拍續集,求證於主角黎諾懿時,佢就大方承認,並透露日內將會與劇集監製見面。「我收到嘅構思係原班人班拍,不過由於幾隻允豬都已經係Trouble Two(兩歲反叛期),所以都要睇下到時邊個會跟我咃多啲再決定。」李佳芯自去年接受子宮囊腫切除手術後,全面暫定拍劇,《BB來了》續集是否其「復出」之作,黎諾懿就好有信心咁話:「我話咗佢唔拍我唔拍,因為當初我哋好困難咁去完成呢件事,如果續集無咗呢個媽咪就已經唔係嗰回事。」對於是否拍攝續集,李佳芯接受《香港01》訪問時,就表示:「如果有需要當要會」。

允豬要讀書,相信李佳芯呢位媽媽好大潛質做怪獸家長。(劇照)

題材方面,黎諾懿雖然唔多肯定,但他認為離不開小朋友教育。「因為監製嘅小朋友都就快讀書,佢應該喺呢個題材上有好多發揮,加上小演員唔易搵,所以更加係會以小朋友為主,唔會有小三、外遇嗰啲架啦。」去年劇集為李佳芯帶來視后寶座,黎諾懿笑言可以將重任交予對方,並指自己只係「扶助」性質。「不過你問我會唔會想憑續集去攞獎,我可以話俾你知我幾時都想,因為呢個係答謝台前幕後工作人員嘅機會,我真係無時無刻都想攞獎,亦希望今次可以成功。」

黎諾懿對於續集嘅教育題材有非常多意見可提供,因為佢最近都不停同小春雞去幼稚園面試,並深感香港教育制度非常失敗。(lokyilai IG圖片)

對於續集嘅題材--教育。家有二歲小春雞嘅黎諾懿透露自己都被呢個問題困擾。「自己都同個囝去咗6間幼稚園,完全唔明點解香港教育制度係咁失敗,佢讀PM班價錢真係貴得可怕,但唔讀又 接唔到……聽朋友講幼稚園面試係要小朋友去裝飾蛋糕,兩歲人仔點會識?我個仔應該淨係會食咗個蛋糕。」黎諾懿笑言並不擔心囝囝無書讀或者輸蝕,因為自己本身都唔係讀書叻。「男人最緊要有信心,見多啲世面。不過,我一定要佢學好英文同國語,其他可以唔理。」