劇集《一屋老友記》前日舉行祝捷會後，昨晚終於大結局。一眾演員歐陽震華（Bobby）、滕麗名（阿滕）、呂慧儀、劉佩玥、胡楓等台前幕後約埋到銅鑼灣開飯，兼且睇大結局，相當熱鬧。

Bobby在祝捷會穿上十多年前的泳衣，表示驚魂未定，「早兩晚已經瞓唔著！（如果35點會著咩？）如果係，咪搵塊葉遮住囉！遮住塊臉！你哋都唔知我係邊個！」問到劇中好拍檔胡定欣最近回復單身，Bobby就話：「邊個話拍拖一定要結婚？舊嘅唔去新嘅又點會嚟！」

而阿滕表示一大班人食飯睇大結局都非常開心，她得悉《一屋老友記》會拍攝旅遊節目也表現得很興奮，「知道會9月實行，個檔期都算就到，只是頭同尾唔得，要Bobby佢哋頂一頂住先！」阿滕透露將會到馬來西亞工作，不過她擔心颱風來襲，影響工作。至於提到定欣甩拖，阿滕就話有留意報導，但如果要介紹好男仔，她笑言她的朋友已經名草有主。