【流行經典50年】薛家燕退位 陳敏之孖胡楓繼續唱:唔會太大改變

撰文:鄺鈺瑩
出版:更新:
胡楓接棒主持《流行經典50年》,大家都好期待佢可以叫契仔黎明做嘉賓。(視覺中國)

播出至今兩年多嘅《流行經典50年》,因擔任音樂總監兼主持的黎小田早前患肺炎入院,需要休養一段時間調理身體,加上台柱薛家燕將舉行巡迴演唱會,二人雙雙請辭後,由胡楓(修哥)接棒,並加入新血鄭俊弘,聯同陳敏之一齊主持。

陳敏之由32集開始加入《流行經典50年》,一直主持至今。(視覺中國)

換血後,陳敏之突然變為「資深」主持人,問到會否擔心年屆87歲嘅修哥體力上應付唔到,陳敏之笑言:「一啲都唔擔心,修哥咁精靈,成日都紮紮跳,同埋佢本身都好鍾意唱歌,我擔心自己多啲。」陳敏之表示與修哥相識多年,又不時都有合作,故完全無需要擔心;至於鄭俊弘,陳敏之指「當佢細佬」一樣,所以亦期待雙方的合作。

陳敏之透露節目嘉賓有專人負責,身為主持嘅佢其實唔需要「碌人情卡」,不過佢就話間中都會比少少提議,例如黃泆潼呢集。(IG圖片)

問到換血後,節目會否改變形式,陳敏之話暫時未收到通知。「應該唔會有太大改變,集數方面亦都無特別講,其實一直以嚟都係咁度期錄影,從來都無話會做幾多集。」主持至今近一年多時間,陳敏之坦言本身因十分喜歡唱歌,所以每次錄影都十分享受,從不感到吃力,而她亦有信心與修哥及鄭俊弘合作愉快。

薛家燕唔再主拎《流行經典50年》,以後又少個機會睇「登基」。(資料圖片)