武漢肺炎全球已經突破4萬宗確診個案，人心惶惶盡量留喺家中唔外出，不過有時工作需要無法唔出門，就要做好防疫措施保護自己。郭少芸呢日出發去馬來西亞吉隆坡工作，全副武裝上陣，防疫措施滴水不漏，不過有網友就指出佢做錯其中一件事隨時有助病菌傳播﹗

郭少芸出發前已經上載喺香港機場嘅相片，戴住口罩留言話：「從未如此忐忑過。」始終飛機係密閉環境，被視為病菌散播高危地方，郭少芸亦做好準備，上到飛機換上防菌力較高嘅KF94口罩，仲著上FULL GEAR，戴齊眼罩、浴帽、膠手套，仲著埋即棄雨衣，佢仲講明唔會喺機上食嘢同去廁所。

不過有網友就指，佢手上嘅噴霧式風扇係就係可以喺乾燥嘅機艙內有助補濕，但「快啲閂部出霧水的風扇！霧氣更易傳播現時的病毒！」郭少芸抵埗後亦表示：「多謝大家的提點，用了「盜賊」好幾年，一時慣了手勢，受教！轉發一下，希望也可溫馨提示其他人，這段期間，大家都要好好保護自己及家人啊！」

郭少芸接受《香港01》記者訪問時就話，佢啲KF94口罩係食炒價買：「我助手響尖沙咀幫我買嘅30蚊1個（你仲有幾多存貨？）10個左右，冇刻意買好多存貨，夠用就算，留返畀一啲有需要嘅人。（機上多唔多人做保護措施？）機上每個人都有戴口罩。（著起full gear有無人望多兩眼？）冇，着成咁係因為聽咗好多朋友嘅建議，佢哋叫我一定要好好保護自己，（會唔會喺當地搵口罩？）未知工作完有冇時間，如果有機會行過藥房之類，會睇下有冇得買，但唔會刻意去搵。順帶一提，就係嗰個「2 in 1 」嘅風扇同霧化機，我冇開到風扇，只係開咗霧化機，離遠釋放一啲消毒香薰 （thieves）, 不過睇完咁多留言，回程都唔會再開喇，多謝大家關心。」最後郭少芸仲話自己已經為回程做好準備，呼籲大家要好好保護自己及家人，同埋勤洗手！