梁凱寧被網友封為「港版孫藝珍」：哈哈...我當係一種讚美！

梁凱寧（Maggie）日前為「香港開電視」時事節目《開嚟見我》內單元，《凱寧教室－「通識篇」》進行錄影，由新聞主播轉型做主持半年，Maggie坦言自己邊學邊做已逐漸適應新工作：「以前做港聞記者要出街採訪，後來做主播就坐定定報新聞，依家做主持，訪問嘉賓之餘，仲要接其它主持爆肚的時政話題，真係好大挑戰！」主持時事節目還需要大量資料搜集，Maggie喺呢方面都下咗不少功夫。

早兩日梁凱寧放一張坐上主播檯嘅相片，令大家誤會佢喺有線新聞再做主播。（IG：@maggieleung0722）

Maggie為做資料搜集，不時在社交網上集思廣益，因而吸引不少粉絲，她不諱言早前因在網上自爆只餘半盒口罩，竟有男粉絲專程從英國寄她大量口罩、搓手液，還奉上一盒心型朱古力，Maggie笑道：「不過佢寄到來時我已有足夠口罩，所以已將佢的心意轉贈有需要嘅老人家！」另外有網民稱呼Maggie為「港版孫藝珍」，佢聽到笑言：「哈哈，我覺得唔似囉！我無睇韓劇習慣，不過都知孫藝珍係靚女，所以多謝網民，我當係一種讚美！」

由訪問人到被訪問，梁凱寧已經開始習慣。