6月6日凌晨，香港廣泛地區落起暴雨，荃灣大埔及沙田區雨量更超過300毫榮，天文台相隔三年再掛起黑色暴雨警告。全晚雷電交加震耳欲聾，好多人都無覺好瞓，最近忙於拍攝劇集《七公主》嘅林夏薇，更因黑雨被困有家歸不得。

最近TVB新劇《七公主》拍攝好多通宵戲，演員們日接夜拍攝相當勞累。林夏薇連續6日拍攝通宵戲，放工想趕返屋企補眠點知撞正三年來首個黑色暴雨警告，喺IG大呻：「終於收工…但黑雨水浸…被困車中，返唔到家…一陣又早廠…救命！」