【Cult到裂開】吳岱融原來做過導演　「大作」《社團之撚位》票房僅6萬

這陣子電視最紅的，一定是《巨輪II》的高天鷲(吳岱融飾)，上星期在劇中鬧李佳芯「X雞」一幕，融哥簡直是視帝級演繹。其實融哥不止演戲出色，更演而優則導，執導過不少電影，三級片當然眾所周知，但融哥連現在很流行的cult片都拍過，說的是他2000年作品《社團之撚位》。

當年在有線電影台無限loop，這套電影正是香港江湖片活躍年代的產物，戲中有不少做慣江湖片的老戲骨黃秋生、尹揚明、黃光亮等坐陣，劇情亦非「一般」，講一社團話事人在遊輪賀壽，因身患絕症，決定分1千萬給各手下以作獎勵，各人有錢就身痕，互揭私怨，之後逐個被殺，最後發現吳岱融是幕後黑手，但他最後不知為何在男廁被殺。戲中另一條綫由張德豪、梁綽滿亦是「經典」，竟然在機鋪為一張膠櫈「開片」，最後身中多刀死在球場，有人覺得另類，可惜更多人覺得騎呢，當年只得6萬票房好慘淡。

今日鷲哥出席新網劇記者會，重提這套作品，表示拍這套電影很艱苦，他說：「當時同老闆傾，我都有份創作，撞啱電影業不景氣，其實都好辛苦，我又演又導，記得秋生好幫手，佢無得傾，佢係神級，一個藝術家，喺佢身上我學到好多嘢，我同佢合作好多次，不過唔再諗做導演喇，一般劇本過唔到我嗰關，我都唔諗住，我其實拍好多，so far都係比較另類嘅嘢，我鍾意用不同角度去講人生，(其實咩叫做撚位？)撚其實係鬥咁嘅意思，譬如佢要坐上呢個位，佢要點樣攪掂佢，即係點樣搶到嗰個位，但撚字就比較直接少少。」原來融哥的中文程度和Ben Sir不相伯仲。