【早霸王】婆媳糾紛激到老婆搬走嗌離婚 丈夫求復合結果竟然...

撰文:鄺鈺瑩
出版:更新:
男聽眾結婚半年,因婆媳糾紛而激到老婆話要離婚。

男聽眾Sam同老婆Sue結婚半年,本來應該仲享受緊新婚的甜蜜,但因為婆媳糾紛,搞到老婆返咗外家,仲話要離婚,為挽救婚姻,Sam於是向《早霸王》求救。婆媳糾紛絕對係世紀家庭難題,Sam表示:「我同媽媽講嘢比較大聲,佢就較為陰聲細氣,可能令佢覺得我哋語氣有少少重。另外,爭廁所、拜神、作息時間等都係吵架嘅原因。」

森美對於「案情」表示唔樂觀。

聽到Sam提到同拍拖一年半、結婚半年左右,森美認為每對夫妻都總會有不咬弘嘅地方,並謂:「夫妻就算點夾,都要相處,偏偏你呢個時候激情走咗,而家講相處時,你就同佢相處唔到。」Sam表示每次婆媳糾紛時,佢都會叫老婆忍讓,好似從未企喺對方角度。「有時話完佢,佢委屈想喊,我都唔會氹佢,佢返外家時,我又唔覺得自己有錯,所以亦唔會搵佢。」結婚半年,老婆已經因為婆媳糾紛而嬲到外家暫住兩次,呢個情況其實都幾嚴重,不過,最慘嘅係,事件驚動到雙方嘅家長,最後仲搞到互相指責……

老婆因為太大壓搞到有抑鬱,但男聽眾似乎未有打算搬走,咁樣真係好難搞喎。

身為愛情專家嘅森美,聽完Sam嘅分享後,似乎感到不太樂觀,並解釋:「人生最痛苦係放唔低,當一個女人決定離開,佢已經係放低咗,亦都唔想再返轉頭。同埋如果佢愛你多過愛自己,其實咩都忍到。」電話接通後,當聽到森美表示有人想示愛後,Sue竟然話估唔到邊個想同自己示愛,原因係「剛剛結束咗一段關係,如果係佢就唔使啦」雖然決絕,但Sue都願意聽Sam嘅道歉:「結婚用咗好多錢,所以你主動話唔使要咁多禮金、唔要大排場,你亦唔介意住劏房,lunch食麵包……」Sam最後喊住咁希望Sue比次機會自己,但老婆沉默好耐之後表示:「我……唔知。」