【神劇預言樓市】《創世紀》陳錦鴻爆金句：財富再分配係好事

陳錦鴻在1999年的《創世紀》，聲嘶力竭，吼出了如下對白，「我試過安份守己，日搏夜搏，賺個一萬幾千，但出面班人，佢哋只係攞少少錢出嚟，攞少少時間，炒起個樓市，就不停賺大錢，咁叫公平咩？你問下出邊任何一個人，佢哋只係想要一間好普通好普通嘅樓。」神劇之所以謂神劇，皆因該劇仿如預言書，17年過去，劇中的樓市瘋癲，人人供樓供到氣咳，竟然一一應驗，更講出了無數無殼蝸牛的苦況。

劇中的許文彪，原是年輕有為的建築師，因生活逼人，角色由戇直善良，腳踏實地，變作奸險毒辣，不擇手段，最後成為身家逾億的大炒家，而當年的爆seed金句，近日再次在網上瘋傳，除了因為無綫重播兩輯《創世紀》，最大原因是樓市再度炒得火熱，現時大家只要擁有一層樓，已屬於人生勝利組，普羅大眾想排公屋又遙遙無期，年輕情侶甚至連親熱的地方也欠奉，民怨沸騰。今日政府突然宣布推出辣招，購入第二層物業要交15%印花稅，希望為熾熱樓市降溫。

陳錦鴻先多謝大家還記得許文彪這個角色，現實生活中他當然不是大炒家，而且戥無殼蝸牛抱不平外，更十分贊成今次政府的加稅辣招，他接受《香港01》記者訪問，「當然贊成加稅啦，既然有人已經解決咗住屋問題，之後再買要交稅好合理，政府收咗稅又可以起多啲公屋。」陳錦鴻更許文彪上身，爆seed說：「當有啲人好有能力，可以錢搵錢，又有稅務優惠，咪愈來愈唔公平。依家係財富再分配，我認為係好事。」

90年代，陳錦鴻於演藝學院畢業後加盟亞視，當時亞視有過一段輝煌歲月，而陳錦鴻亦拍過幾齣膾炙人口的劇集，包括兩輯《點解阿sir係隻鬼》及《槍神》等，至94年轉投無綫，在劇集《新上海灘》已經擔正做男一許文強及在《雪山飛狐》飾演胡斐。至1999年的《創世紀》，陳錦鴻更踏上了事業高峰，初次飾演大奸角許文彪，觀眾同情他在劇中遭遇，對他可謂又愛又恨，令人留下深刻印象。

陳錦鴻靚仔又好戲，至2013年尾被當時氣勢如虹的港視招攬，但人算不如天算，港視竟然不獲發牌，開台無期，令陳錦鴻進退維谷。他表示：「時間過得好快，仲有一年合約，而且依家有糧出緊。」（對未來有何打算？）「其實都係只有等，咪當多啲時間照顧小朋友囉。不過我又無hea喺度，依家好勤力做運動，唔會俾自己走樣。」(無綫鬧緊小生荒，不如回巢啦？)「無綫搵我梗係返去啦，但未有人接觸我。」問到他今次政府辣招對他有否影響，他笑說：「應該咁講，自己有能力又唔介意俾多啲嘅，只能講句依家樓市好過份，好唔健康。」