專訪 ｜《銀河修理員》跑出屬純意外 Dear Jane：本身冇落重注
《哀的美敦書》先係年度主打
Dear Jane趕及在樂壇頒獎禮前夕推出全新大碟《Limerence》，記載著不同的愛情狀態。早在3月時已派台的《銀河修理員》治癮了不少樂迷 ， 年底成了音樂串流平台Spotify今年最高串流量歌曲，亦殺入叱咤樂壇「我最喜愛的歌曲」最後五強名單，足見唱情歌的Dear Jane依舊是樂迷最愛。Tim說：「當初無論係公司或者我哋四個都落重籌碼喺《哀的美敦書》，而《銀河》只係 Opening，佢嘅歌詞好簡單，但所提及到嘅嘢，好多人都未必會思考過。今年嘅氣氛令大家都有啲迷失、唔識向前望，但人生本來就有好多關卡，而家只係有少少亂流，我自己最開心係呢首歌可以陪到大家。」
一遇Wyman有花火
Dear Jane曾在鄭融的《13樓的大笨象》、容祖兒《心之科學》與黃偉文間接地合作，直到去年他們在構思大碟時，認為可以擦出更多火花。黃偉文曾在IG上提到《銀河》是他與Dear Jane「遲了11年的歌」，如今看來，作品來得剛剛好，Tim亦十分認同，他說：「有時真係好講Timing、講運數，我收到份詞時都『哇』咗，因為當中好多嘢自己都係學習當中，錄音時亦有好多啟發，就好似喺大家亂晒陣腳時，輕輕關心、扶持對方，其實都係出於愛。」
難忘前度「驚喜」
《哀的美敦書》面世後，瞬即成了網民心中的「年度最強兵歌」，Dear Jane自覺在面對愛情時尚算清醒，識得煞停，所以既未服過「兵」疫，也未曾癡戀（Limerence）過，Nice說：「當你喜歡一個人時，付出其實好正常，唔知點解大家將呢種付出睇得好負面。」感情路上，總要經歷過才知道好與壞，Howie認為愛總會有瘋狂，但最緊要懂得臨崖勒馬，因為自控也是對自己的尊重，他有朋友曾以氣油威脅女友的父母，令他感到十分可怕，並認為這才是真正的「痴」戀。Jackal說：「試過喺女朋友屋企樓下等佢，諗住畀驚喜對方，佢當時喺電話話就返到，結果佢全晚都無返屋企，最後分手收場。」對於這個意想不到的「驚喜」，Jackal慶幸有良好的自制能力，Tim補充說：「每個人都要經歷過唔清醒，才可以將心底的情感抽出來，也可以知道好與壞。」
歌迷問隻碟點喺手機播
疫情停工期間，不少藝人趁機自我提升，Dear Jane卻大唱反調，Howie笑言:「我除咗做碟之外，完全無努力做人。如果唔係《Limerence》，我完全唔記得自己做過什麼。」Tim直言腦部運作完全停頓：「有啲人會收埋自己一年用來創作 , 但其實當你自己一個人嘅時候，周邊無嘢又何來衝擊？如果要peaceful不如去修佛。」逆市下出碟，Dear Jane自覺奢侈，但其實他們也曾跟唱片公司討論過是否真有出實體碟的需要，Tim說：「當有Fans問『我買咗你隻碟，但唔識得點喺電話播』時，我真係唔覺得需要出CD，不過又咁諗，有Budget、有心機、精神、有人陪你去做碟係要珍惜。」
疫境下的滿分
受疫情影響，Dear Jane說這次有足夠時間去雕琢專輯的歌，既可以重錄又重新編曲，而更難得的是在灌錄大碟前已有主題（過往大多將派台單曲結集成大碟）。Tim說:「今年係滿分，因為好利用到時間，做到一隻碟係同世界Connected，而呢隻碟我哋係滿意嘅，已經好足夠。頒獎禮成績係Bonus，我哋最開心係所做嘅音樂唔只屬於Dear Jane，而係屬於聽眾，融入大家生活一部，呢個真係勝過所有。」