鄭中基個唱終極加場多謝朱咪咪 叫粉絲盡量撲飛:唔試一定「矛」

撰文:郭敏玲
出版:更新:
暴龍哥咁好!咪咪姐又咁幫手,各位fans記得7號公開發售撲飛啦!

鄭中基(Ronald)早前宣布農曆新年於紅館開兩場個場,因門票火速售罄,大會宣布加開一場,不少網民都話:「終於有得睇暴龍哥唱歌啦!」並到處撲飛,希望可以聽返鄭中基多首經典歌,回味一下。

之但係3場又好似唔太夠,就喺呢個時候,鄭中基就在facebook自拍片段宣布加開大年初三(1月30日)終極尾場,合共4場,實在可喜可賀!能夠順利加到場,鄭中基竟然多謝朱咪咪喎!「因為咪咪姐係下一個檔期嘅歌手,佢就肯畀多一日時間我哋,咁就要好多謝咪咪姐!」更講到而家搞掂晒,好在有咪咪姐:「否則都不知點算好。」咪咪姐咁好人,各位暴龍哥fans一齊多謝佢送份厚禮畀大家!【「龍」過雞年 - 鄭中基曾想亞博開個唱︰觀眾嫌遠,都係紅館啦!】

Ronald仲講到知道有好多歌迷對他開演唱會表示支持,他感到相當開心,但同時都為有些朋友未能買到飛,還去他的facebook留言投訴,Ronald表示有睇留言,覺得唔好意思,皆因都唔到佢控制,「我有睇呀!睇到我心都噏,原本演唱會飛賣得好,應該好開心,但見到歌迷買不到飛,又戥他們慘,所以我一直有同主辦單位商討有關加場問題,亦有想過加開下午場。」如今成功爭取加開年初三尾場,Ronald都話唔可以再加,叫各位Fans記得7號落力撲飛,仲回應認為自己買唔到飛的Fans留言:「唔試一定矛(無)!」都真係唔話得!

多謝咪咪姐,鄭中基才可以在大年初三加開一場個唱!(資料圖片)