緬甸今日（28日）下午發生黎克特制7.9級強烈地震，震源深度30公里，泰國曼谷亦受影響，有明顯震感，身處當地的羅敏莊拍片直言嚇到手震，更爆喊稱：「其實都唔知會唔會死呀」，陳鍵鋒、「泰國通」胡慧冲亦在社交平台報平安。而關楚耀（Kelvin）的KOL老婆Joann原來亦身處曼谷，她在IG限時動態分享當地情況，直言：「好得人驚」！

Joann透露一落車就發現全部人都跑，原來是地震，但幸好沒有大礙，不過返到酒店後發現牆身裂開：「返上房，我見我啲化妝品冇跌晒落地以為OK，原來廁所埲牆出面裂晒……入邊啲瓷磚都鬆鬆地」。其實Joann上個月同老公關楚耀到冰島旅行自駕遊時，曾遇上冰島30號風球，經歷超級暴風雪，更遭遇驚險意外，車門因承受不住暴風雪被吹反了，無法閂門，關楚耀更被困車廂，相當危險！今次在曼谷經歷地震，Joann都直言好黑仔：「去冰島已經全國紅色警報，曼谷而家又緊急狀態。點解我呢幾次去旅行都好似歷險咁，諗住返鄉下都可以遇到曼谷百年一遇嘅地震，我真係黑腳嚟……」