歌手黃淑蔓（Feanna）近日在社交平台自揭於尖沙咀商場行街期間，懷疑遭一名陌生男子非禮，事後她在網上分享經過並提醒女士出門要提高警覺。事件引起大批網民關注，不少人聲援她之餘，亦有人表示曾遇上疑似同一名男子，憂慮對方或為「慣犯」色狼。

黃淑蔓今晚（13/12）現身西九戲曲中心出席音樂會，就事件接受《香港01》訪問時表示：「其實喺網上面我冇講得好清楚，我純粹都希望大家可以小心啲，不過我都唔驚嘅。同埋上次都有少少嬲自己，反應唔切，下次如果再遇到，應該就會做一個再適當少少嘅反應。」

被問到會作出什麼反應？黃淑蔓表示：「其實我都唔知，因為遇到呢啲事嘅時候，都係好緊急嘅好突發，有機會係1秒就過咗去，咁你冇理由1秒之後突然之間隔咗5秒你先嗌，咁所以都係我覺得我會再警惕少少，即係無論喺邊度行街都好，都要警惕身邊發生緊嘅事。（有網民對你處理手法有意見？）其實我覺得做咩都會有唔同嘅意見同聲音，有時你未必知道嗰件事百分百分係知點樣發生，但係我聽我身邊嘅人意見多囉。」