陳懿德與羅天宇同遊埃及引起不少注意，有人更言是高調曬幸福兼曝光戀情。今日（22/12）陳懿德出席記者會時接受《香港01》訪問，雖然沒有避談戀情，但依然保持一貫作風的回避問題，相當有趣！

她說：「埃及係好啱一團人去，所以我哋係一大團朋友去。我覺得去完真係幾開心，七大奇觀之一嘛。我拍咗好多片，都諗住出片去介紹呢個地方。（而家同羅天宇係半公開？）我哋不嬲個好朋友關係都係公開㗎，大家都係幾好幾好。（呢個答案麻麻哋）咁我返去諗吓，下次再答你呢個問題。」

會不會公開關係？她又回答：「唔係呀，我哋都好舒服而家呢個關係。（公開啲，佢少啲狂風浪蝶）我覺得關係係雙方嘅。（你都好多人追？）又唔係咁講，我意思係大家互相信任，大家都開心先可以keep到。（佢好多人吼住）係咩？咁我戥佢開心，證明佢係一個好男仔。（你有冇人追？）我還好啦，都冇乜特別，因為我專注工作。你好似好為我擔心喎。（你都知佢花名係乜）呢啲都係一個標籤啫，又唔係真係咁嘅，係咪先？佢都提名最佳男配啦，證明佢對工作係好有要求，同埋好上進，都係一個乖仔，最聽公司話嘅。」