向氏家族上月傳出噩耗，新義安創辦人向前的長子向華炎，於12月23日在九龍聖德肋撒醫院離世。 喪禮今日（19/1）於世界殯儀館地下世界大禮堂舉行設靈，讓親友作最後悼念。翌日（1月20日）舉行出殯，靈柩奉移和合石火葬場進行火化禮。

被譽為「戒毒教父」綽號「茅躉華」的陳慎芝亦有到場悼念，逗留一小時後離開靈堂。陳慎芝接受《香港01》訪問時表示：「我認識炎哥都三十幾年，但見面只係3次，但傾偈就傾唔到十句，因為見親都係一班人圍住，都係打招呼同禮節性啫，一直喺江湖上都講佢個人係Ok嘅。其實好多人都唔知道，喺江湖上好多嘢佢都係撳住咗，佢好少同人講，佢命令唔准搞事，呢個係真嘅，佢係一個以和為貴嘅一個好長者嚟。所以四方八面嘅人，都係好尊重佢。（有幾多江湖兄弟嚟？）我睇有4、5千人嚟，（向華炎為人如何？）佢好客氣，但好多人覺得佢好威嚴，佢係好威嚴，但佢會同你打招呼，佢係一個好好嘅長者嚟。（知唔知佢咩事離開？）唔知，人生就係咁，但知佢人生都做咗好多好事，可能有人會話佢乜乜乜，但呢個係上面傳落嚟都冇辦法。」