無綫（TVB）播出的新劇《重案解密》於4月16日在優酷港劇場首播，今晚5月4日亦於翡翠台播出。日前（5月3日）苗僑偉、陶大宇、岑麗香等人出席宣傳活動。

苗僑偉選擇性失憶：只係記得40年嘅嘢

苗僑偉（三哥）和陶大宇接受《香港01》訪問，記者尚未開口，陶大宇已經笑言：「三哥睇住我大㗎，哈哈。」三哥笑了笑又回說：「一齊大。」足見多年朋友的兩人關係十分好。三哥和陶大宇回憶，兩人已相識40多年，陶大宇表示自己入行時拍攝第一部劇集就已經和三哥認識，又指拍攝《重案解密》時考三哥記憶力，講起往事。不過，三哥就笑言：「我哋而家已經記唔到4日前嘅嘢，只係記得40年嘅嘢。」

陶大宇憑《倒轉地球》走紅 登台唔唱冇人請

談到近況，少不免提及陶大宇的《倒轉地球》。現在還有內地登台騷要唱《倒轉地球》？他回答：「有有哋㗎，如果我唔倒轉嘅話我驚冇人請我，佢請我就係想我倒轉。大家開心㗎啫，我覺得冇乜所謂。（唔唱呢首仲有咩歌？）唔係呀，直頭唔請我呀！佢話唔好意思，請我就係想要呢樣嘢，我覺得冇乜所謂，大家笑吓都係開心嘅。」