陳宇琛（石仔）在ViuTV 電視劇《IT狗2.0》客串，「子繼父業」重演《隔世追兇》經典橋段「一滴兩滴三滴」。昨日（5月10日）他出席商場活動時，提起拍攝時花絮，坦言爸爸石修事後也有睇到這一段，更大讚表現出色！

陳宇琛致敬爸爸石修 重現經典橋段「一滴兩滴三滴」

陳宇琛：「佢自己知有呢樣嘢（meme圖）。（佢知唔知咩係meme？）我諗隔咗幾廿年，大約知道嘅。當時出街冇咁流行，但係而家post吓post吓，佢都知係咩一回事。我都睇過網上有好多升華版，仲有個係brad pitt版本，咁我都有模仿brad pitt去做嗰種情緒。而家拍埋兩條片點解咁一模一樣，一滴兩滴三滴，我都跟足佢。（似brad pitt定爸爸多啲？）er⋯⋯真話定假話？er⋯⋯我，我梗係覺得自己似brad pitt，咁梗係冇可能啦，但係啲網民好畀面，話我唔係模糊緊，而係超越咗。我覺得係一份致敬，都係做返畀daddy睇，嗰日佢睇完好開心，喺度笑。」