《魔音女團》引起不少迴響，原來視帝黎耀祥都有留意！日前他與龔嘉欣、孔德賢、倪嘉雯、丁子朗宣傳《香港探秘地圖》，接受《東張》主持鄧凱文訪問時，祥哥講到在劇中要幫倪嘉雯搵返魂魄：「全靠我將佢嘅魂魄搵返返嚟，一搵返嚟我就叫佢參加女團。」然後《魔音女團》成員之一的鄧凱文就問祥哥是否支持倪嘉雯，祥哥說：「我唔止支持佢，仲支持埋你㗎！一路睇住你由海選到……大家改進，喺度嗰種努力，我真係一路睇住你哋㗎！」

之後祥哥更突然跳起女團的手勢舞，邊唱出她們翻唱容祖兒的《Lucky Star》，不僅做「蘭花手」手勢，還跳到反晒白眼，雖然僅僅幾秒，但已表現非常忘我，演繹出視帝級一秒入戲！片段在網上瘋傳，網民翻睇又翻睇，更想起多年前祥哥在《樂壇插班生》扮演羅文，也是維肖維妙。

網民留言：「佢唔拍X片 真係浪費曬 以前佢個d陰陽路系列 好笑到傻」、「依個咪就係我地想睇嘅黎耀祥囉😂」、「認真，祥哥仲好睇過班女團」、「祥哥，叫你模仿，唔係叫你超越！」、「做咩變左阮兆祥」、「救命，祥哥成晚係我個腦入面撒緊嬌，訓唔著🥲🥲」