已故賭王何鴻燊三房兒子何猷啟在2020年宣布與齊嬌（Gigi）離婚，結束短短兩年的婚姻，離婚後齊嬌獨力照顧兩名女兒。雖然齊嬌由豪門新抱回歸平淡，但時常周遊列國歎世界，生活依然富貴，更會與呂良偉、楊小娟聚會。夏日將至，齊嬌已迫不及待帶埋女兒出海，女兒人仔細細已識揸細艇，齊嬌曬出傲人身材，令人羨慕！

何猷啟齊嬌女兒人仔細細揸艇出海

齊嬌在Instagram限時動態曬出多段出海影片。齊嬌帶女兒及朋友一齊揸遊艇出海玩，齊嬌女兒雖然仍年幼，但跟住阿媽出海玩得多，連細艇都識揸，而且看上去淡定又有自信，笑容滿面，似乎已相當熟練，十分犀利！齊嬌又帶埋個女一齊玩有繩滑水，齊嬌不忘曬出性感身材，身為兩女之母Keep得出色，玩得開心。