寶珮如（Baby）早前公開一張拍攝電影《藍天白雲》被狂摑至微絲血管爆裂的照片，引起大眾關注，同時亦勾起她面骨裝有鈦金屬片的慘痛回憶。寶珮如（Baby）曾是亞洲電視的「福將、王牌」，卻在轉戰台灣後結識一位江湖大佬，不幸遇上嚴重車禍慘遭毀容！寶珮如深知破相是女藝人的致命傷，看著唇上永不磨滅的傷疤，一度眼眶通紅感觸自己：「不再美麗。」
從單親木屋區長大、因難忍身心折磨狂吞數十粒安眠藥尋死，到47歲遇上任職ICAC的丈夫Matthew，縱然車禍留低未能生育的遺憾，但寶珮如仍展現出超強的生命力。今集《由零說起》，一起回看寶珮如的重生之旅！

單親家庭長大　聞豬屎味撈飯

自小在單親家庭長大的寶珮如，一家住在觀塘茜草灣的木屋區，生活環境極度惡劣。「我哋木屋係嗰啲搭出嚟嘅，啱啱對面係一個豬欄，啲人係養豬嘅。我哋係聞住啲臭豬味去食飯嘅，譬如啲人啱啱洗豬嘅便便，一條渠一邊沖，一邊好臭，我哋就係咁樣長大。」
在她三歲、弟弟剛出生的時候，父親便拋妻棄子，從此音訊全無。這個缺失的父愛，在她心中轉化為一種恨意。「冇諗過見佢，佢亦都冇出現過，所以佢係生定死，我哋都唔知。」為了減輕母親打兩份工的重擔，寶珮如中一開始半工讀，到中三更索性輟學，全職賺錢供弟弟讀書。

淚崩憶失智母飲新抱茶：佢只係話唔靚

受父母婚姻失敗影響，寶珮如一直對婚姻沒有憧憬，即使母親屢次催婚想抱孫，她也堅拒結婚。直到2011年，她終於卸下心防步入婚姻，但當時母親已經患上嚴重的老人痴呆症，住進了安老院，再也無法清醒地見證女兒的幸福。

寶珮如在訪問中憶起這段往事，不禁哽咽淚崩：「我媽媽成日都想睇我結婚嘅日子，我就偏偏唔結婚。到我結婚嗰陣，我媽媽喺安老院，佢老人痴呆，所以反而好遺憾呢件事。我著住裙褂去安老院斟茶畀佢飲，但佢已經冇認知，佢淨係認得我同我細佬，但佢唔知我結咗婚。」看著生命中最愛的母親，在自己大婚之日形同陌路，成為寶珮如心中永遠的痛。「我斟茶畀佢飲嗰陣，佢都唔識講嘢，因為杯茶好熱，佢淨係話『唔靚，杯茶唔靚』。」

棄姓陳改姓寶入行　被林建明視為「亞視王牌」

出社會後，寶珮如做過偵探社職員、酒樓知客，後來更到酒廊代唱。因為一時貪玩，她參加了亞視的《未來偶像爭霸戰》，活潑的形象獲得了當時亞視高層周梁淑怡的賞識。決定入行時，周太提議為她改名，甚至連姓氏都要改。「我本身叫陳珮如，佢話『我想同你改姓』，我話『好呀好呀改姓呀，反正我老豆都唔理我哋』。」

一入行，寶珮如備受力捧，拍住林建明（大姐明）主持《香港蠱惑檔案》，其後更參演經典劇集《肥貓正傳》飾演「阿芳」，事業一帆風順。「嗰陣時同大姐明合作，佢成日問我有冇帶腦返嚟，成日話我『十吓十吓』。但其實佢好錫我，教我好多嘢。」林建明甚至私下向朋友大讚寶珮如是亞視的「王牌」。

與駱達華拍拖女尊男卑

隨著節目收視高企，寶珮如瞬間爆紅，成為亞視的「福將」，然而，她的事業起飛卻令初戀男友駱達華感到不是味兒。「佢捱咗好多年，由訓練班路人甲乙丙慢慢做起，而我冇經過呢個階段就已經好多記者寫。有時記者知道我哋拍拖，都冇人寫駱達華三個字，只係話『寶珮如男朋友』，佢都唔開心。」

當年無綫（TVB）挖角，她仍不為所動。「我當時同駱達華一齊供樓，但TVB俾嘅錢好少，我喺亞視嘅錢好多，成日做好多嘢爆騷！」但為了尋求突破，寶珮如在事業高峰期毅然轉戰台灣，卻迎來了人生的急轉直下。在台灣，不懂國語的她一切從零開始，生活極度拮据。「我覺得喺台灣嗰時最淒涼，達仔（駱達華）搵朋友幫手租屋，我住喺人哋屋企，瞓喺廚房，一張榻榻米鋪喺地下，寄人籬下。」這段異鄉落難的日子，她更與相戀16年的駱達華和平分手。

遇嚴重車禍　面骨盡碎陷人生谷底

在台灣期間，寶珮如結識了一名江湖背景的男子，回港後拍拖短短半年，一場突如其來的嚴重車禍，徹底粉碎了她的容貌與自信。

撞車的瞬間，她的面部直接受到重創，下顎面骨盡碎，牙骨全部沒了，盆骨亦移位裂開「我傷得最嚴重係我破相，我面骨依家有塊鈦金屬片，喺口腔入面有塊片托住，鑲滿螺絲喺度。因為碎面骨，要托番起啲骨。」除了面骨變形，她昔日的一口牙齒也化為烏有，只能戴上假牙；更令她痛苦的是，上唇被嚴重「剪爛」，縫合後肌肉收縮變成了兔唇，需要割下耳後的肉來進行多次植皮修復手術。

毀容的現實，對一個愛美的女藝人而言是毀滅性的。寶珮如含著淚眼說：「對一個破相嘅女藝人嚟講，係一個致命傷。我係破相嘅，我依家學識與佢（兔唇）共存。我以前我唔會，好傷心，我係一件靚嘅衫，我都覺得着喺我身上唔靚，我覺得我樣子破壞咗呢件衫，我係嚴重到咁嘅地步，點樣着落去都唔靚。」

受失眠困擾曾吞藥輕生　望無敵海景奇蹟生還

車禍後的七年裡，寶珮如無法工作，每天要24小時穿著壓力衣，生活只能困在四面牆內，不斷進出醫院做大大小小的手術。身心的劇痛加上巨額的醫療費，讓她陷入了極度的抑鬱之中。「我每日起身都喊，寫日記全部都係眼淚、都係負面。我覺得人生冇咩意義，我最貪靚又唔靚，又冇嘢做，好似廢人咁，見醫生多過見朋友。」

在萬念俱灰下，她狂吞三、四十粒安眠企圖輕生。奇蹟的是，她沉睡了六七個小時後，竟然看著藍天白雲醒來，沒有暈眩也沒有嘔吐。「我好冷靜咁問自己，死唔去。我試過有幾十樓好想跳落去，我冇勇氣，即係話我對死冇勇氣。安眠藥原來拍戲先得，原來冇作用。咁不如真真正正放手，唔好再介懷自己有幾多分，80分好、70分都唔理，靠住信仰行番我開心嘅路。」

瞞母七年報喜不報憂　獲林建明袁潔儀救命扶持

為了不讓一生辛勞的母親擔心，寶珮如將自己車禍毀容的真相隱瞞了足足七年。「屋企人呃佢話我去咗外國拍嘢，到我行得番，我返去見媽媽，個嘴貼住膠布，我一直借錢度日當畀家用。媽媽只係問我點解成日貼住膠布，係咪畀人打？我話跌親。佢仲以為係我同達仔分手佢打我。」

在她最艱難、窮到連朋友都紛紛疏遠的時候，圈中好友林建明和袁潔儀成為了她的救命恩人。「大姐明係女王，好錫我。我做手術時佢一直坐喺冷巷冇離開過，等我做完姑娘叫佢走佢先走。佢仲籌咗一大筆錢放落封利是度畀我出院做補品。潔儀就係我最好嘅天使，佢出糧、登台有錢，就會打畀我攞嚟畀我做生活費同手術費。」這些雪中送炭的恩情，寶珮如至今銘記，並在復出後逐一還清了欠款。

場地：十里（時代廣場）

想詳盡知道陳志雲的故事？即上《香港01》YouTube睇足本訪問！