舞台劇《寫不得你》，由梁祖堯自編自導，聯同王菀之（Ivana）、谷祖琳及盧鎮業（小野）合演，將於10月公演，今日（27/7）舉行記招。作為張敬軒好友的Ivana，被問到可有去澳門睇軒公演唱會，她表示未有去到，但亦有留意他狀態不錯。「我有睇到佢唱歌啲片，唱得好好。」

有見軒公在台上分享時，情緒波動感觸落淚，Ivana就叫大家不用擔心。「我哋做創作，內心多數儲起好多情感，去到台上一刻就會好坦誠地表達出來。最近我哋都少見面，不過都有聯絡。」

此外，問到演藝畢業的梁祖堯，對鍾景輝老師的離世可有釋懷，他覺得能活用King Sir所教的，就是最好的紀念。「佢留畀我哋最重要係，話畀業界聽咩係專業，佢嘅種子已留在大家心裡，我哋要守住呢份專業先可以行落去，如果我哋係用佢教嘅東西去守住，佢嘅生命就會得以延續，相信用呢個方式懷念係佢最想見到。」