導演谷德昭日前（15日）正式「登六」迎來60歲大壽！雖然近日他因為公開力撐好友周星馳的新作《功夫女足》，而在網上與網民引發連場口水戰，但是非無損壽星公的好心情。踏入花甲之年的他，獲家人熱情慶祝，盡顯溫馨親情！

屬馬迎60歲　搞笑自嘲「耳順」

谷德昭於8月15日迎來60歲生日，他在IG分享了自己拿着迷你壽桃的單人照。相中見他戴上有色太陽眼鏡，笑得「四萬咁口」，並站在一幅寫著「馬」字的畫作前開心留影。他風趣地寫道：「小弟屬馬，從這一刻開始耳順，但願笑對人生，睇戲睇書又一Day。#今年壽桃多」。

姨甥女夾攻獻吻　溫馨背後洩腳患隱憂

原來除了食壽桃，谷德昭日前亦獲家人大搞派對慶祝。其姨甥女Amanda在Threads分享了慶生現場的溫馨照片，只見背後佈置了巨型的「60」字粉紅氣球，相當有儀式感。谷德昭更被兩位後輩左右夾攻「肉緊」親吻面珠，𠱁得他笑逐顏開。不過，近年飽受腳患困擾的谷德昭，在合照時需要雙手緊緊扶實兩張椅子的椅柄作為助力，以支撐身體。

Amanda在帖文中搞笑表示：「原來影呢啲嘴嘴相，真係會令人好尷尬。」但隨後即感性地向舅父表白：「世界天高海深也比不上您的輕輕一笑，God was too busy so he made Kau Fus（感謝舅父經常陪伴及照顧）。」從Amanda分享的舊照片，可見谷德昭與已故胞姊（即谷薇麗）等家人不時有家庭聚會，足見一家人感情極度深厚。

另外，谷德昭亦在facebook分享更多生日派對的相片，吳君如、林海峰、鄭希怡夫婦、容祖兒、陳奕迅等圈中好有亦有出席，谷德昭寫道：「好友倪震贈我兩句：『爆谷一甲子 笑傲六旬春 一甲子生日』，跟親朋好友聚聚，很開心看見老人家們笑口常開，同輩好友戰友們酒醉飯飽，小朋友們也玩得投入，如此場面，我心開透，夫復何求，一甲子生日是一個階段，好好想想以後該如何。人生不盡如人意，能控制在手裡的並不多，唯心境可調整，六十而耳順，自問修為未達諸事不煩心境界，學習告訴自己縱是未能即時耳順，但應有足夠年資閱歷，過濾亂我心者，入耳出耳達到耳順，若你堅持2+2 = 8，我會答：『I Totally Agree With You』冇乜好拗，早啲瞓好過，學而時習之，學懂如何耳順輕鬆好奇純粹求其過生活，當然仍積極努力求突破，抱著一甲子2.0的心態，開心最緊要。對，開心最緊要。PS ：聽到祖祖和阿臣現場合唱《歡樂今宵》，眼眶兒登時紅了。#統一感謝每位祝福我的朋友 #搞生日都真係幾攰 #收到的禮物都很窩心 #恕不逐一道謝」。

懶理網民爭議　輕鬆笑對人生

至於早前因在電台節目評論網民抵制《功夫女足》無廣東話版，而掀起的網路爭議，谷德昭亦在生日後於Facebook大方發文回應。他澄清自己從未將《功夫女足》與其他電影作比較，言論初衷只是「擔心」香港年輕一代會因某些原因而收窄視野，「我冇話過邊個啱與唔啱，有講過要放開懷抱看世界，有講過話如果因某原因就『不了』的話，我『擔心』蝕底嘅係自己（我愛香港年青一代）。」踏入60歲耳順之年的他，看來已經看化是非，決定放開懷抱，笑對人生。