郭柏妍在《夫妻的博弈》中的表現令人驚喜，演活了一個與自己平時形象大相逕庭的角色，由《下流上車族》的「芊芊」，變成人人喊打的「綠茶Sherman」。如此巨大的轉變，無疑令觀眾留下深刻的印象。

被問到今次角色的突破，郭柏妍在接受《香港01》專訪時表示：「我覺得到差好遠嘅，其實同我本人都差好遠，唔單單係芊芊。因為我覺得芊芊嗰時嘅我係更加貼近我自己嘅，因為能屈能伸啲，遇到挫折唔怕，或者係遇強越強。」

心理思想由陌生到理解

然而，郭柏妍在《夫妻的博弈》中的角色卻是一個徹頭徹尾的壞人。「呢個角色我自己覺得比起我以往嘅角色都比較複雜少少，同埋係做一個真係壞人。今次係差唔多橫跨25集，我都可以話係一個壞人嚟，害高Ling（高海寧）、害Ssnna，但我哋表面上係一個好好嘅閨蜜，實際上我係不斷咁害佢，仲利用好多身邊嘅人去完成佢自己嘅嘢。」除了陷害閨蜜，角色極度拜金、追求名牌、善於討好男人的價值觀，也讓平日生活簡單的郭柏妍在前期準備時感到極度吃力。「佢好識得利用自己嘅身體去獲取一啲好處，同我自己嘅性格有啲唔係幾一樣。」

為更了解角色，郭柏妍甚至要在片場私下練習「嗲嗲聲」，而在心理代入上，她坦言前期經歷了巨大的掙扎：「我自己諗嘢都偏向正面嘅，同佢諗嘅嘢唔一樣。人哋一句話『你有冇事呀』，佢腦入面可能會諗好多唔同嘅嘢：呢個人係邊個？點解同我講有冇事？我點樣可以利用呢句『有冇事』去令自己有好處呢？但係我嘅話就係冇事。所以前期去適應呢個角色嘅時候，我會比較吃力少少。」

但正是這種思想上的碰撞，讓她對所謂的「綠茶」有了全新的理解與反思。「反而做咗呢個角色之後會明白，其實呢個角色畀咗我好多啟發。有時呢個環境點解會有一個咁樣嘅人，其實可能佢嘅成長背景，係一個單親嘅家庭，可能佢嘅世界就係一定要力爭上游，或者係『我喺懸崖邊，有一束救命草，我可以捉住，我當然一定要捉住』。我覺得呢個係唔可以全怪佢唔啱嘅。」

工作環境遇上綠茶

既然在戲中將「綠茶」演得入木三分，那麼在現實的工作環境中，郭柏妍又有否遇到過類似的人？對此，她坦言：「工作環境……點都會有類似呢啲嘅女仔的人，但係有時見到都冇理，即係有，我都冇辦法，因為控制唔到人哋講嘅嘢或者做嘅嘢，我只會做好我自己。」

郭柏妍自爆曾被不友善對待

談及自己過往被「綠茶」或不友善對待的經歷，郭柏妍回憶起小時候在補習班的一段往事：「好細個嘅時候，試過返一啲補習班，可能佢唔知點解會踢我書包，然後我就唔知有咩嘢得罪佢，其實我都好少同嗰個人講嘢，然後佢就會踢我書包。好彩佢係踢我書包，佢唔係打我。以前真係會好唔開心，點解佢要咁做？同埋佢喺其他人面前又唔會對我差，但佢就會做呢啲嘢令到你唔好受。」

價值觀可以選擇

自從演了這個角色，現在的郭柏妍反而對這種人有另一種看法：「可能佢嘅背景，佢一定有原因去做呢啲嘢，但我唔去考究喇。既然佢係咁，我又好難去改變一個人，那就自己嘅心態調整，可能佢有些難處。」

在劇中，角色為了攀附權貴不惜在酒局上被摸大腿、出賣肉體；而在現實職場中，面對各種選擇，郭柏妍有着非常明確的底線與價值觀：「我覺得呢個係選擇，真係睇一個人點樣揀。即係就算佢係單親家庭，如果佢轉一轉個想法嘅話，點解唔可以諗『就算我係單親家庭又點呢？我唔一定要去害人嘅』。其實大家都喺不幸中，點解唔可以互相扶持去成就大家更加好呢？與其不斷追隨着一個人嘅步伐，點解唔走自己嘅路呢？」