《中年好聲音》決賽昨日（23日）圓滿落幕，賽前大熱尹景順最終不負眾望，成功奪得冠軍寶座。賽後他與同入三甲的兩位參賽者許雲妮及鄭家聲一同接受傳媒訪問，除了分享得獎喜悅，更激罕大談當年赴台灣發展的辛酸史，直認當年競爭大兼「搵唔到食」，最終輾轉來到香港才終於圓夢。

認決賽有「甩漏」 承諾日後唱得更好

對於成功奪冠，尹景順表現謙虛，直言感謝評審的包容及觀眾的投票。他坦言自己在決賽當晚的表現並非完美：「我今日係好多甩漏嘅，不過我攞咗呢個獎之後我會再繼續努力，以後有更多表演嘅機會，可以唱好啲畀大家聽。」同場的得獎者亦分享了感受，大家均表示對賽果感到驚喜，並感謝電視台及家人的支持，指比賽過程「好好玩」，完全是享受舞台的發揮。

憶述台灣追夢辛酸與「搵唔到食」

訪問中，尹景順被問及過往在台灣發展的經歷。他透露當年因為台灣音樂發展機會較大，特意前往當地讀書並逗留了6年，期間參加過不少歌唱比賽。然而，要在台灣出道卻困難重重：「其實我喺台灣嗰段時間，我係去咗度參加好多比賽啦，咁因為嗰陣時呢喺台灣嘅音樂發展嘅機會比較大，所以我就去咗台灣讀書啦，跟住又喺度逗留咗六年呀，讀書跟住唱歌。咁但係唱歌真係比較難嘅嗰邊，因為如果要喺留返嗰度唱歌，你一定要有工作證啦，同埋要或者係有唱片公司肯簽你，你先有辦法喺嗰度做演藝事業嘅。」

尹景順表示自己當時就是沒有這個機會：「最後都冇發展成功，所以先嚟到香港，多謝香港畀我呢個機會可以攞到一個冠軍。」他直言台灣的酒吧駐唱競爭極大：「我覺得係真係出過片嘅歌手先可以唱。」礙於未遇到合適機會，他最終未能成功在台灣發展。

談到在台灣和馬來西亞是否「搵唔到食」，尹景順笑言自己其實非常慳家，甚至可以「一日一蚊都唔用」！原來他在馬來西亞時，因為家人經營餐廳，所以完全不需要花錢買飯：「因為我係一個好幸福好幸福嘅小孩，即係我每次真係起咗身呢就等飯食。食咗飯呢去Gym，Gym咗就去做工，做工返嚟打PS5，即係做工又包飯食，完全就唔使用錢嘅。」尹景順最後幽默地總結自己轉戰香港的原因：「我就係喺台灣、馬來西亞賺唔到錢，嚟香港賺錢！」