現年38歲的2010年港姐冠軍陳庭欣（Toby），今年初宣佈與「10億男友」楊振源（Benny）和平分手，結束8年情。回復單身後，Toby不但被指搬離九肚山愛巢，回到黃大仙的500呎蝸居，早前更在活動上自爆與「金牌媒人」林盛斌（Bob）介紹的幾位男生見面，但未有著落，苦笑說：「阿Bob冇理我啦，哈哈！冇再Send嘢過嚟。」

雖然被外界形容為「豪門夢碎」，但Toby依然心態極好，不介意與27歲嫩口「東張男神」曾錦燊（Charles）傳出姊弟戀緋聞，還拍住上拍片推介美食，甜蜜互動大晒CP（Couple/情侶）感！

孖緋聞男友拍宣傳片　情侶裝上陣甜度爆表

雖然Toby澄清與曾錦燊只是相識多時的好朋友及工作夥伴，但兩人近日卻不避嫌，以情侶檔姿態為餐廳拍攝宣傳片！片中兩人默契十足，更齊齊穿上棗紅色情侶裝，CP感滿瀉。

影片開首，Toby笑問：「嚟旺角做乜先？」曾錦燊即冧爆回應：「請你食飯囉，平時教我咁多嘢。」 Toby隨即如𠱁小朋友般摸摸對方個頭，大讚：「咁好，你終於生性啦！」 曾錦燊更豪言要滿足她所有願望，冧得Toby在旁擺出心心手勢，甜到漏！

茶餐廳撐枱腳　曾錦燊餵食甜品放閃

兩人在片中介紹美食時互動頻繁，曾錦燊更親自餵Toby食甜品，場面溫馨。Toby事後在社交平台留言：「😭 有啲人終於大個仔啦，識諗啦，請我去食好西🍗🥩🍜」 雖然兩人各自有不同口味喜好，Toby鍾意菠蘿油西多士，而Charles就愛沙嗲牛，但亦無阻兩人齊齊擦餐飽，更笑言餐廳能「滿足晒所有人嘅食慾」。