年度的選美盛事《2026香港小姐競選》決賽將至，昨日（24/8）12位候選佳麗齊集尖沙咀出席記者會。其中10號佳麗陳梓穎接受《香港01》訪問時，被問到即將要拍攝拉票影片及呼籲朋友投票的準備情況，她笑言目前心態非常隨緣。

談到拉票策略，陳梓穎坦言：「我暫時都未諗到點樣呼籲朋友拉票，因為我覺得自己對呢樣嘢又唔係話完全冇所謂，我都在意嘅，但我覺得順其自然啦！我更加享受呢個過程，因為今趟旅程已經學咗好多嘢。我覺得入到嚟已經好勇，最緊要喺台上穩定發揮，到時咩結果都係最好嘅安排。」

穿高跟鞋腳腫苦不堪言 自備「秘密武器」舒緩陣痛

除了備戰心態，參選港姐最考驗佳麗的莫過於長時間穿著高跟鞋。陳梓穎亦不諱言，大會準備的高跟鞋高度對她來說是一個不小的挑戰。

被問到如何應對雙腳疲勞，陳梓穎透露早已準備好「救星」：「我都買咗啲腳貼同埋按摩機！因為真係日日穿高跟鞋，腳真係好腫、好緊。暫時就未試過抽筋，因為我地最近練舞之前都會拉筋，都有幫助嘅。」

密集式綵排忙到飛起 搞笑自爆：見佳麗多過見家人

隨著決賽日子臨近，12位佳麗的日程安排得密密麻麻。陳梓穎透露這兩星期的訓練非常緊湊，每天都排練至深夜。提到家庭生活，她打趣道：「呢兩個星期真係好忙，我哋每日排練都排到凌晨十二點，返到屋企屋企人已經瞓晒，第二朝早出門口嗰陣，佢哋又未起身！所以暫時真係見11位靚女佳麗多過見爹哋媽咪。不過屋企人都叫我唔好咁緊張，叫我穩定發揮、做返自己就得，冇畀好大壓力我。」

出場華麗轉圈驚艷全場 臨場發揮全憑直覺

在出場環節中，陳梓穎的表現相當吸睛，更在台上大秀「反智轉身」擺Pose，展現靈巧一面。被問到是否特意設計動作搶鏡，她笑著澄清這完全是臨場應變：「其實我係睇緊我要企喺咩位置，點知轉咗個靚圈！其實我都真係即興，因為頭先彩排嗰時都係就咁行出來擺Pose俾大家影相。每次上台都會有啲突發事件，今次個突發事件就係轉咗個靚圈出來。」