早前無綫《娛樂新聞台》外景主持人黃浩霆在電影《浪花男女》的宣傳活動上，因採訪任達華時準備不足、發問錯誤，慘遭大批網民怒轟「未做足功課」、缺乏專業態度。

任達華（華哥）今晚（1/9）盛裝出席時裝騷活動，接受《香港01》訪問被問及此事時，展現出極高的修養與前輩風範。對於被指當時神情嚴肅、疑「嚇親」對方，華哥連忙笑著澄清，表示自己完全沒有放在心上。

華哥表示：「其實好似我哋初初出嚟拍戲都會有錯，位會行錯，燈光會遮咗人哋個樣。我覺得對佢嚟講係一個好好嘅經驗，我覺得我哋應該畀多啲包容同鼓勵，我哋應該多啲幫一啲新嘅主持，新嘅演員，新嘅歌手一齊合作，從而令到呢個世界變得精彩。（會唔會介意？）唔會，OK㗎，我覺得應該俾多啲機會佢，自從今次之後，佢會變得聰明，佢會做多啲功課，加上佢口齒伶俐，我哋繼續支持佢。」