前TVB小花朱智賢（Ashley）日前作客HOY TV節目《九運會客室2》中重提當年拍攝無綫王牌旅遊節目《3日2夜》的辛酸史，大爆曾被逼脫衣拍溫泉鏡頭，更直言曾與導演鬧翻。事件曝光後引起網民熱烈討論。對此，《3日2夜》金牌監製張志明接受《香港01》訪問時親自回應，開腔揭開當年拍攝的真正內情。

朱智賢曾親自訴苦　張志明：佢剩係針對個女導演

張志明透露，朱智賢私下曾與他吃飯傾訴過此事：「其實嗰陣時佢同啲Crew、攝影嗰啲全部好Friend，係嗰個導演同佢有啲唔係好啱。佢就覺得佢成日叫佢除衫、露，所以佢哋係有啲反咗面嘅。」張志明強調這只是個別事件，並澄清朱智賢並非針對幕後男性工作人員，矛頭純粹指向該名女導演：「呢度係佢針對嗰個女導演嘅啫，唔關事係咪男人問題，其餘嗰啲男人佢哋基本上玩到癲晒，唔知幾開心！」

女導演被指要求嚴苛：個個都覺得佢唔啱

談到該名女導演，張志明坦言對方在TVB任職多年，在行內行事作風較具爭議：「好老實，嗰個女導演係同個個都唔啱嘅，拍嘢全部個個都覺得佢唔啱，拍完又拍、拍完又拍。」他更指該女導演要求繁複，常要求女藝人穿少一點：「可能女導演又比較狼啲，成日都叫佢哋『著少啲、著少啲』。」因此拍攝時女藝員反而更喜歡與男導演合作。

澄清非臨時逼拍　回港後當笑話一則

至於是否有「臨時逼拍」或底線問題，張志明解釋所有拍攝安排在出發前早已溝通好：「如果話之前要拍啲乜，溫泉、落水嗰啲，其實喺香港已經開會傾晒㗎啦，點會臨時叫佢哋拍呢啲？唔會嘅。」他又指女藝人走光鏡頭極少，有時水底拍攝需要特別小心。張志明表示，朱智賢返港後大家亦只當笑話一場，笑完就算；而朱智賢其後亦繼續參與拍攝工作，過程同樣開心，事件純屬個別單一事件，並未影響她與整個團隊的好感情。