陳百祥（阿叻）在1995年和1996年主持的遊戲節目《運財至叻星》，平均收視達30多點，最高收視曾經有40點，為其演藝生涯最經典主持節目之一。阿叻日前拍片揭開《運財至叻星》秘密，他提到一向拒絕上綜藝節目的王菲因一個原因應承上《運財至叻星》，又爆成龍最怕一個人！

阿叻爆王菲「毛遂自薦」上《運財至叻星》

阿叻透露，Beyond和王菲曾堅拒上電視綜藝節目，「王菲唔鍾意上綜藝節目、唔講嘢㗎，唱歌都唔嚟，好難請㗎！」阿叻指王菲竟「毛遂自薦」上《運財至叻星》，「因為佢覺得好玩呀嘛！係佢毛遂自薦，叫唱片公司同我哋講。咁王菲要上嚟，我哋梗係俾佢上嚟啦！」

阿叻又指，他特意邀成龍和洪金寶一齊上節目，他說：「成龍最怕洪金寶，現場俾洪金寶『質』到成龍瞓咗喺度。」他又指成龍最怕洪金寶，「兩師兄弟呀嘛，大師兄係洪金寶，細個佢用藤條打成龍㗎！所以成日叫：『阿龍，埋嚟！』」並笑言：「成龍乜人都唔驚，最驚洪金寶。」阿叻透露上他節目的都是天王巨星，而TVB小生花旦上不了他的節目。