歐陽震華剖白30年丁克婚姻 與百億老婆拒生B:雙雙入豪華老人院
現年66歲的歐陽震華(Bobby),與澳門一代賭王傅老榕孫女、家族資產估計逾百億的傅潔嫻結婚30年,一直恩愛如昔。早前Bobby接受汪曼玲的YouTube訪談節目《快拍.曼鏡頭》,訪問中,他重提多年來被外界視為「食軟飯」的委屈,斬釘截鐵表示婚後開支全由自己一力承擔:「唉!我做得咁辛苦,我維持呢個家。有好多人講得好難聽嘅都有,話我軟飯王……我無使過佢一分錢!」
今日(16日)最新一集訪問,Bobby就剖白與太太由結婚第一日已決定做「丁克一族」(有生育能力但選擇不生育)的心路歷程,更大談不靠仔女的超前衛養老計劃!
拒生B怕手尾長:我哋個腦得十幾歲
被問到30年的婚姻是否一開始就決定不生育,Bobby直認不諱,坦言當年雖然已屆適婚生子之齡,但心態依然未定性:「係呀,我哋結婚嗰時都已經成30歲。雖然係30歲嘅外殼,但我個腦都係得10幾歲嘅啫,我好多嘢都未見過,有好多嘢都未玩過!」
Bobby解釋,自己搏殺多年才終於嚐到財政鬆動的滋味,根本不想馬上被生仔縛死:「10幾年不斷咁樣工作,做嘢做嘢又做嘢,到咗30幾歲鬆動啲,唔使食嘢淨係睇個價錢啦,都畀我鬆幾年!你唔係生完之後就完咗呢件事喎,而係呢件事啱啱開始,下面嗰啲手尾跟住你。」
雙方家族零壓力 寧雙雙入住豪華老人院
對於傳宗接代,Bobby直言雙方家庭都非常開明:「我太太嗰邊有冇俾壓力佢?我呢邊又冇咩壓力。同埋我同太太其實都好怕湊細路仔嘅……比工人湊又唔知湊到點,咁唔使啦!」
沒有子女,老來由誰照顧?Bobby的答案極度灑脫,霸氣表示早就計劃好與太太雙雙入住安老院:「冇人照顧咪雙雙入老人院囉!唔係一定要坐輪椅先入去㗎,依家啲老人院好靚、好豪華!生活有人安排好晒,有啲兩公婆日日可以出街嘅,只不過唔出街平時就有飯畀你食,執埋啲藥俾你食。你話傳宗接代又好點樣都好,呢啲係預計唔到嘅結果嚟嘅……唔好父母本身諗住養兒防老。」
慶幸行運在後頭 慳家本色自己剪頭髮
回顧大半生,Bobby對現在60多歲的安穩生活感到極度感恩,自言是「先苦後甜」:「人哋話行運唔好咁後生吓,先苦後甜?冇錯。到我呢個年紀呢就明㗎啦,錢呢就去買一樣嘢好容易,但係你想將嗰樣賣返去錢呢,就難到你想像唔到咁難!而家到咗呢個年紀,你想做又未必做得啱,唔好亂咁使。」
雖然太太出身百億名門,但他自己的生活要求卻低得驚人:「我其實都唔係好積穀防飢㗎嘞,都係要做嘅,唔係話好冇錢,好少好少好少⋯⋯唔夠啦,基本生活㗎咋,我唔係要求好高,唔需要穿金戴銀。我連剪頭髮錢都慳,哈,自己剪,幾慳呀!」